Në rrjetet sociale vazhdojnë të përdoren emrat e mjekëve të njohur, me qëllim rritjen e klikimeve, duke mashtruar direkt lexuesit. Postime të tilla kanë krijuar shqetësim te mjekët, por edhe te lexuesit online.

—————————————————————————————————————————–

Në rrjetet sociale po përdoren emrat dhe fotot e mjekëve të njohur shqiptarë nga faqe fiktive, me qëllim rritjen e klikimeve. Në tre postime që “Faktoje” evidentoi është përdorur mjeku infeksionist, Arjan Harxhi.

Dr. Arjan Harxhi: Shqiptarë, ju lutem! Ndaloni marrjen e pilulave nën presion. Merrni një lugë gjelle në stomak bosh”, shkruhet në postimet në Facebook.

Në një tjetër publikim të shpërndarë shkruhet: “LAJM I TMERSHEM! Infarkte te shumta tek pensionistët! Nuk ka mjaftueshëm mjekë për të ndihmuar çdokënd!” Postimi është shoqëruar edhe me logon e televizionit “News24” me qëllim që ta bëjë sa më të besueshëm për lexuesit, në mënyrë që ata të klikojnë linkun bashkëngjitur.

Screenshot, postimet e bëra në rrjetet sociale

Nëse do të klikojmë linket e vendosura në këto tre postime shihet që ato të dërgojnë në faqe fiktive, që duket se përdoren vetëm për të mbledhur klikime.

“Faktoje” kontaktoi edhe mjekun Arjan Harxhi, i cili theksoi se është përdorur në mënyrë abuzive figura e tij, pasi nuk ka sugjeruar dhe as nuk ka dhënë miratimin për publikime të tilla.

“Po më thonë miqtë që vazhdojnë këto postime në emrin tim”, shprehet mjeku infeksionist, Arjan Harxhi.

Skema të tilla fiktive, që përdorin figurat e mjekëve të njohur përdoren për të mashtruar përdoruesit e mediave online me qëllim rritjen e klikimeve.

 ‘Lajmi publikohet në kuadër të bashkëpunimit mes Faktoje dhe Facebook për të luftuar dizinformimin