Pjesëmarrësit në mitingun e presidentit Joe Biden në vitin 2021 nuk kërkuan kthimin e Donald Trump, por anulimin e një gazsjellësi. Faktoje sjell pamjet e plota, që tregojnë se pretendimet në rrjetet sociale nuk janë të sakta.
Postime të shpërndara në rrjetet sociale në vendin tonë pretendojnë se gjatë një tubimi të presidentit Joe Biden, një grup pjesëmarrësish i ndërprenë fjalën duke kërkuar Donald Trump.
“Qytetarët amerikanë që po marrin pjesë sot në një miting të Joe Biden, bërtasin në kor: ‘Na duhet Donald Trump“-shkruajnë përdorues në rrjetet sociale.
Postimet e shpërndara në rrjetet sociale
Postimi shoqërohet me një video ku duket presidenti Biden duke qëndruar pas një foltoreje, ndërsa ish-guvernatori i Virxhinias Terry McAuliffe qëndron pas tij. Në video dëgjohet turma duke bërtitur, ndërsa Biden përpiqet që të flasë. Teksa buzëqesh, presidenti amerikan thotë: “Jemi në rregull. Shikoni, nuk është tubim i Trump. Lërini të ulërasin”.
Fillimisht ne bëmë një verifikim të pamjeve, nëpërmjet mjeteve të verifikimit të fotove dhe video. Nga kërkimi rezulton se në fakt video i përket korrikut të vitit 2021, por është risjellë në vëmendje si zhvillim aktual.
Mirëpo, shihet se në fakt turma nuk bërtiste për Trump, por kundërshtote një projekt tubacioni, raportohet në artikullin e verifikuar nga kolegët e “USA Today”. Më 23 korrik 2021, Biden ishte në Virxhinia për të ndihmuar Terry McAuliffe, me fushatën e tij për guvernator.
Mbulimi i C-SPAN tregon se Biden ishte në mes të fjalimit mbi shkallën e vaksinimit në vend kur një grup nga turma filluan të bërtisnin, “Ndaloni linjën tre”. Bëhej fjalë për një projekt të diskutueshëm tubacioni që shtrihet nga Kanadaja në Wisconsin.
Videoja e plotë e C-SPAN tregon kënde të ndryshme të turmës. Edhe në zbardhjen e fjalimit të presidentit Biden nga Shtëpia e Bardhë shihet që është përfshirë kjo ndërprerje që ndodhi gjatë mitingut të mbajtur në korrik të vitit 2021.
