Në ditën e fundit të vitit, presidenti rus, Vladimir Putin u shfaq duke trokitur gotat me ushtarët heronj rusë. Analistët e zhvillimeve në Rusi ngritën dyshime për aktorë të veshur si ushtarakë, por kësaj here duket se propaganda ruse ka të drejtë.
Ndryshe nga tradita, presidenti rus Putin e regjistroi kësaj here mesazhin e tij televiziv për vitin e ri nga një kazermë ushtarake jo shumë larg kufirit me Ukrainën, një skenar i denjë për situatën e mobilizimit ushtarak që ndodhet vendi. Putin u shfaq përpara një dyzine ushtarakësh për të dhënë mesazhet e tij politike për vitin 2023.
Mediat ndërkombëtare, si dhe disa prej portaleve shqiptare, kanë ngritur ndërkohë dyshimin se ushtarakët që u shfaqën gjatë këtij fjalimit të carit rus ishin aktorë apo njerëz të besuar të veshur me uniforma ushtarake. I tillë është rasti i portalit Shqiptarja.com si dhe Zgjohushqiptar, të cilët i bënë jehonë këtij manipulimi të shfaqjes së fundit televizive të Putin.
Nga verifikimi i “Faktoje”, rezulton se ky lajm është publikuar gjerësisht nga mediat e huaja gjatë ditëve të para të vitit. I pari që e denoncoi publikisht dyshimin e një shfaqjeve aktoriale, ishte gazetari bjellorus në ekzil Tadeusz Giczan. Në profilin e tij në Twitter u vu në dukje një prej ushtareve që qëndronte pranë Putin, një grua e moshës së mesme, me flokë bionde, e identifikuar si Serguhina Larissa Borisovna, një anëtare e parlamentit rus, e cila është bërë e njohur për shfaqjet e saj të mëparshme në disa prej daljeve në publik të presidentit.
Borisovna, 57 vjeç, nga qyteti i Novgorodit, anëtare e “Rusisë së Bashkuar”, partisë së Vladimir Putinit, u kthye në një personazh qesharak disa vite më parë. Fillimisht, në shtator 2016 ajo u fotografua me veshjen e një peshkatareje në një barkë dhe më pas, në kremtimet kishtare gjatë festës së Krishtlindjes ortodokse në janar 2017. Së bashku me të, ndodhedhin edhe 3 “peshkatarë” të tjerë besnikë.
Pas ekspozimit të fotove nga mediat perëndimore, deputetja u justifikua se kishte shoqëruar presidentin gjatë vizitës së tij në vendlindjen e saj dhe ishte gjithashtu edhe pronare e një kompanie peshkimi.
Deputetja e besuar e partisë së Putin, e ekspozuar në dy foto të ndryshme gjatë vizitës së Putin në Novgorod
Pas publikimit të lajmit të aktorëve të veshur si ushtarakë, mediat pro ruse publikuan identitetin e ushtarakes në foto. Sipas tyre bëhet fjalë për kryekapitenen e shërbimit mjekësor të regjimentit të 71-të, Anna Sidorenko, e cila edhe u dekorua gjatë vizitës nga presidenti Putin.
Lajmi u konfirmua edhe nga mediat perëndimore, pasi majin e kaluar, Sidorenko, u identifikua si ushtarake nga inteligjenca ukrainase, e cila mori listën e anëtarëve të stafit të regjimentit të 71-të të ushtrisë ruse. Në listën e bërë publike, në vendin e 204-të mund të lexohet: “Kapiteni i shërbimit mjekësor Sydorenko Anna Sergeevna, 14.12.1982, nr. personal U-870823, nr. tab. 00548471“.
Gjithashtu, në një krahasim të fotove të deputetes dhe mjekes ushtarake, pavarësisht ngjashmërive, dallohet diferenca e moshës mes dy biondeve që pozojnë përkrah presidentit.
Majtas, ushtarakja Sidorenko dhe djathtas deputetja Borisovna, burimi TF1
Pavarësisht këtij lajmi të pavërtetë, nuk duhet harruar se në kohën e transmetimit të këtij regjistrimi të urimit për vitin e ri, ushtria ruse po bombardonte objektiva civile në Ukrainë.
