EMIRJOLA VELIA

Urgjenca e Spitalit rajonal të Kukwsit nisi të funksionojë në javën e tretë të janarit 2022, ndonëse ishte premtuar se do ishte gati që në muajin dhjetor. Ndërkohë kirugjia, edhe ajo e premtuar se do të hapej në dhjetor pritet të jetë funksionale në fund të muajit shkurt, sipas konfirmimit të autoriteteve spitalore. Investimi rreth 3 mln euro i qeverisë shqiptare, sipas një premtimi të mëhershëm duhej të kishte përfunduar tërësisht në 2021, por në fund të atij viti minstrja e Shëndetësisë njoftoi se pjesa e maternitetit dhe laboratorit do të përfundonin në 2022.

*Foto e marrë nga faqja zyrtare e MSH

Në javën e parë të dhjetorit 2021, gjatë një inspektimi të punimeve për spitalin e ri të Kukësit, Ministrja e Shëndetësisë Ogerta Manastirliu, e cila shoqërohej edhe nga prefekti i qarkut deklaroi:

“Shumë shpejt, brenda disa javësh pritet të vihet në funksion urgjenca e re dhe sallat operatore në spitalin e Kukësit, që do të ndryshojnë rrënjësisht shërbimin e urgjencës.”

Këtë afat e konfirmoi edhe drejtuesi i spitalit, ndërsa shoqëronte ministren gjatë inspektimit në 7 dhjetor 2021.

Nga një verifikim për Faktoje rezultoi se urgjenca e këtij spitali nuk u arrit të vihej në fuksion gjatë dhjetorit, por pas 20 janarit 2022, ditë kur prefekti i qarkut dhe Kryebashkiaku i Kukësit përuruan mjediset e reja të saj.

Nga përgjigjja e një kërkese për informacion, dërguar për Faktoje në fund të janarit 2022, Spitali i Kukësit, konfirmoi se urgjenca e re me kapacitet 10 shtretër, është funksionale. Në përgjigje sqarohet se një tjetër mjedis i këtij spitali me kapacitet 20 shtretër është i dedikuar për pacientët post-covid.

Screenshot i përgjigjes së Spitalit të Kukësit, shkurt 2022

Pyetjes së Faktoje se kur do të vihet në funksion kirurgjia, që sipas premtimit duhet të ishte hapur brenda dhjetorit 2021, Spitali i Kukësit iu përgjigj se sallat e operacionit, të cilat janë tërësisht të pajisura me mjetet përkatëse janë në fazën e testimit dhe pritet të jenë funksionale brenda muajit shkurt.

Screenshot i përgjigjes së Spitalit të Kukësit, shkurt 2022

Rikonstruksioni tërësor i spitali rajonal të Kukësit kushton rreth 5.5 miliard lekë nga të cilët 422 milion lekë janë financim i Qeverisë Shqiptare dhe 130 milion lekë të Bankës Botërore.

Spitali rajonal “Meriman Jakupi” në Kukës u shërben banorëve të tri bashkive që përfshin qarku i Kukësit me mbi 100 mijë banorë. Ky spital raportohet t’i ketë shërbyer banorëve edhe gjatë periudhës së rikonstruksionit duke u përballur edhe me situatat e vështira që solli pandemia.

Nisur nga verifikimi i kryer në terren dhe informacioni i grumbulluar, vendosëm që deklaratën dhënë në 7 dhjetor nga ministrja e Shëndetësisë se urgjenca dhe sallat e kirurgjisë do ishin funksionale brenda dhjetorit, ta kategorizojmë të Pavërtetë.

Kujtojmë se në fund të janarit 2020, ministrja Manastirliu u zotua se i gjithë kompleksi spitalor i Kukësit do të përfundonte krejtësisht brenda vitit 2021, por në dhjetor të atij viti, ajo njoftoi se disa pavione priten të përfundojnë gjatë vitit 2022.