Javën e ardhshme termometri pritet të zbresë deri në -1 gradë celcius në zonat malore, por nuk ka vend për panic, siç pretendojnë disa portale. “Faktoje kontaktoi meteorologen Tanja Porja, e cila konfirmoi se nuk do të kemi temperatura ekstreme në ditët e festive.
————————————————————————————————————————————
Në një artikull të publikuar më 19 dhjetor, portalet ngrenë alarmin në lidhje me një ndryshim të temperaturave, duke përdorur një titull “bombastik”.
“Po vjen ashpër! Tanja Porja jep LAJMIN E MADH se si do mbyllet Dhjetori dhe ndryshim që do bëjnë temperaturat”, shkruan portali Lajmi I Fundit.
Screenshot, lajmi i publikuar nga portali Lajmi I Fundit
Mirëpo, nëse do të shohim artikullin në brendësi, shihet qartë se nuk ka vend për panik, pasi bëhet fjalë për temperatura normale.
“Termometri pritet të zbresë në -1 gradë në mesjavë, që pritet të jetë pjesa më ftohtë e javës”, shkruan ndër të tjera portali.
Për ta bërë artikullin të besueshëm për lexuesit, faqja në fjalë ka cituar meteorologen e njohur, Tanja Porja. ”Faktoje” kontaktoi zonjën Porja, e cila u shpreh se nuk ka deklaruar se do të ketë temperatura ekstreme.
“Pjesa e parë e informacionit është korrekte, por unë nuk kam thënë asgjë për temperatura ekstreme”, u shpreh meteorologia. Më tej, ajo bëri të ditur si do të jetë moti në javët në vazhdim, ku termometri do të zbresë deri në -1 gradë celcius.
“Kemi disa ditë me diell, mëngjeset janë të freskëta në mesditë nuk do të kemi temperaturë si ato që përjetuam javën e kaluar. Java do jetë pa reshje deri ditën e diel, ku termometri gjatë orëve të mëngjesit në zonat e thella malore zbret rreth -1 në mesjavë, që pritet të jetë edhe pjesa më e ftohtë e javës, ndërsa kemi rreth 17-18 gradë celcius përgjithësisht gjatë kësaj jave”, thotë meteorologia Tanja Porja.
Shënim:
Data 28 dhjetor 2022 portali tel.hilsn.com e ka korrigjuar dhe përmirësuar artikullin https://tel.hilsn.com/po-vjen-ashper-tanja-porja-jep-lajmin-e-madh-se-si-do-mbyllet-dhjetori-dhe-ndryshim-qe-do-bejne-temperaturat pas verfikimit të lajmit nga ana e Faktoje. Lajmit të raportuar i është ndryshuar vlerësimi fillestar në Facebook.
