Kapiteni i Kombëtares së Katarit nuk mbajti një shirit me flamurin palestinez në ndeshjen hapëse të Kupës së Botës. Verifikimi ynë zbulon se fotoja që bëri xhiron e botës, por edhe të mediave në Shqipëri, në fakt nuk i përket kapitenit Hassan Al-Haidous.
————————————————————————————————————-
Më 20 nëntor, faqja e Facebook ‘Lajme Sporti’ ka bërë një postim , ku shkruan: “Kapiteni i Kombëtares së Katarit, Hassan Al-Haidous mbanë shiritin e kapitenit me flamurin palestinez!”
Screenshot, postimi në Facebook nga ‘Lajme Sporti’
Teksti shoqërohet me një foto të shiritit të kapitenit me ngjyrat e flamurit palestinez, në krahun e një individi të paidentifikuar, i cili mbante veshur fanellën e Kombëtares së Katarit.
Kjo foto u bë virale në situatën e debatit që shkaktoi vendimi i Federatës Ndërkombëtare të Futbollit (FIFA) për të frenuar iniciativën e disa federatave të futbollit, të cilat kishin shpallur synimin e tyre për të vendosur simbolin e flamurit LGBT+, në shenjë proteste kundër politikave represive të Katarit.
Disa prej atyre që shpërndanë lajmin e shiritit me flamurin palestinez në krahun e kapitenit të Katarit, mendonin se bëhej fjalë për një tjetër simbolikë të përdorur nga futbollistët për një çështje politike si ajo e konfliktit shumëvjeçar në Lindjen e Mesme mes Izraelit dhe Palestinës.
“Faktoje” vendosi të verifikojë më tej këtë foto për të zbuluar se bëhet fjalë për një manipulim. Ndeshja hapëse e Kupës së Botës 2022 u zhvillua më 20 nëntor midis ekipit të vendit organizator të Katarit dhe ekipit kombëtar të Ekuadorit, por asnjë referencë për flamurin palestinez nuk u shfaq në fushë. Siç mund të verifikohet përmes fotove të publikuara nga Getty Images, kapiteni i Katarit, Hassan Al-Haydos, ka mbajtur një shirit me shprehjen: “Futbolli bashkon botën”.
*Lajmi publikohet në kuadër të bashkëpunimit mes Faktoje dhe Facebook për të luftuar dizinformimin
