Pretendimi: Hantavirusi përmendet në broshurën për vaksinën kundër Covid të Pfizer si një nga efektet anësore të listuara.
Verdikti: Mungon konteksti
——————————————————-
Në rrjetet konspiracioniste, përfshi ato shqipfolëse, po qarkullon fragmenti i një raporti mbi efektet e padëshiruara të vaksinës anti-Covid të prodhuar nga Pfizer, në të cilën përmendet hantavirusi, me pretendimin se hantavirusi është një efekt anësor i vaksinës.
Hantavirusi është një sëmundje e rrallë, por serioze që zakonisht transmetohet nga brejtësit, veçanërisht përmes jashtëqitjes ose urinës së tyre.
Më 4 maj 2026, Organizata Botërore e Shëndetësisë (OBSh) raportoi një shpërthim të hantavirusit në anijen turistike MV Hondius, të ankoruar në ishullin e Kepit të Gjelbër. Ky shpërthim infektiv kishte shkaktuar tre vdekje dhe një pacient në gjendje kritike, sipas deklaratës.
Sipas OBSh, 5 nga 9 rastet e dyshuara janë konfirmuar në laborator. Rasti i fundit u konfirmua nga Instituti Kombëtar për Shëndetin Publik dhe Mjedisin (RIVM) i Holandës, një pasagjer në anijen turistike MV Hondius.
Dokumenti që citon postimi i mësipërm ishte pjesë e një kërkese për informacionit të paraqitur nga një grup prej mbi 30 profesorësh dhe shkencëtarësh nga universitete, përfshirë Harvardin, Yale, Brown dhe UCLA. Në kërkesën e tyre, të paraqitur më 16 shtator 2021, paditësit i kërkuan Administratës amerikane të Barnave dhe Ushqimit (FDA) të ndante të dhënat mbi të cilat bazohej autorizimi i vaksinës Covid-19 të Pfizer.
“Infeksioni pulmonar nga hantavirusi” shfaqet në faqen 33 të raportit “Analiza Kumulative e Raporteve të Reaksioneve të Padëshiruara Pas Autorizimit”, brenda “Listës së Ngjarjeve të Padëshiruara me Shqetësim të Veçantë”, së bashku me qindra ngjarje të tjera.
Një përkufizim i termit “ngjarje të padëshiruara me interes të veçant딑 (AESI) është pjesë e një dokumenti të FDA mbi “Optimizimin e Mbledhjes së të Dhënave të Sigurisë” për barnat e reja dhe barnat në proces miratimi. FDA i përkufizon AESI kështu:
“Këto ngjarje të padëshiruara mund të kërkojnë mbledhjen e informacionit shtesë në të gjithë popullatën e studimit për t’i karakterizuar më mirë këto ngjarje (p.sh., parametra specifikë laboratorikë; shenja jetësore; faktorë rreziku; terapi të njëkohshme dhe/ose sëmundje të njëkohshme).”
Më thjesht, ngjarjet e padëshiruara me interes të veçantë janë gjendje shëndetësore që studiuesit duhet t’i monitorojnë nga afër gjatë një prove dhe që nuk shkaktohen nga vaksina. Kur u dorëzua dokumenti i Pfizer, vaksina e saj ishte ende e autorizuar për përdorim në raste urgjente.
Lista e AESI u hartua nga Brighton Collaboration, protokolli ACCESS i Agjencisë Evropiane të Barnave, Qendra amerikane për Kontrollin dhe Parandalimin e Sëmundjeve (CDC) dhe Agjencia Rregullatore e Barnave dhe Produkteve të Kujdesit Shëndetësor të Mbretërisë së Bashkuar.
Shumica e numrave të raportuar në dokumentin e Pfizer vijnë nga grupet e ekspertëve dhe autoritetet rregullatore të listuara më sipër, dhe Sistemi i Raportimit të Ngjarjeve të Padëshiruara të Vaksinave (VAERS) në Shtetet e Bashkuara, i cili drejtohet nga CDC dhe FDA.
Faktoje.al ka përgënjeshtruar dhe më parë pretendime në lidhje me vdekjet nga vaksinat që keqpërdorin VAERS.
Kushdo që ka qasje në internet mund të shtojë një raport në listën e raporteve të VAERS. Faqja e saj e internetit paralajmëron shprehimisht kundër përfundimeve të pajustifikuara bazuar në materialin VAERS sepse lista ofron vetëm një numër shënimesh të paverifikuara në lidhje me çdo ngjarje shëndetësore që njerëzit përjetojnë pasi vaksinohen.
Lista në vetvete nuk mund të përdoret për të vërtetuar ose përcaktuar shkakun, pasi gjithë çka tregon është një lidhje kronologjike midis vaksinimit dhe një ngjarjeje shëndetësore, jo një lidhje shkak-pasojë.
Vetë dokumenti sqaron në metodologji se rastet në këtë listë vijnë nga raporte spontane nga autoritetet shëndetësore, revistat mjekësore, programet dhe studimet e Pfizer, “pavarësisht nga vlerësimi i shkakësisë,” domethënë, pavarësisht nëse ekziston apo jo një marrëdhënie shkakësore e provuar.
Për më tepër, raporti paralajmëron shprehimisht se një grumbullim raportesh “nuk do të thotë domosdoshmërisht se një efekt i padëshiruar specifik është shkaktuar nga ilaçi”, kështu që shfaqja e një termi në listë nuk vërteton se vaksina e shkaktoi atë efekt.
Pfizer konfirmoi për EFE Verifica se “infeksioni hantavirus nuk është i listuar si një efekt anësor në fletën e të dhënave teknike për vaksinën Pfizer-BioNTech kundër Covid-19”, duke shtuar se “ata monitorojnë vazhdimisht sigurinë e vaksinës së tyre”.
