Një grafik i OBSh që tregon uljen e rasteve të gripit në vitet 2020 dhe 2021 po përdoret nga konspiracionistët për të pretenduar se pandemia e Covid-19 ishte një mashtrim. Verifikimi i “Faktoje” shpjegon se rastet e gripit u ulën këto vite si pasojë e masave që u morën për parandalimin e përhapjes së Covid-19.
Një grafik i Organizatës Botërore të Shëndetit (OBSh) që tregon uljen e rasteve të gripit në vitet 2020 dhe 2021 po qarkullon në rrjete sociale me pretendimin se pandemia e Covid-19 ishte në fakt thjesht raste të gripit të prezantuara si një virus i ri. “Grafiku është i OBSH. Ku dreqin u zhduk gripi në 2020/2021…..Ah…. Po…. Ka ndërruar emër… Quhet cov….”, shkruhet në postimin që shoqëron një grafik zyrtar të OBSH.
Në të vërtetë, sipas Qendrës amerikane për Kontrollin e Sëmundjeve (CDC), OBSh, dhe një sërë hulumtuesish dhe shkencëtarësh, rënia e theksuar e rasteve të gripit në vitet 2020-2021 erdhi me gjasa si pasojë e masave të marra për parandalimin e përhapjes së Covid-19.
Duke qenë se gripi përhapet nga një trup tek tjetri me anë të stërkalave të pështymës, njësoj si Covid-19, masat që u morën në mbarë botën si mbajtja e maskave, distancimi social, larja e shpeshtë e duarve dhe qëndrimi në shtëpi parandaluan si përhapjen e gripit dhe atë të Covid-19.
Megjithatë, gripi dhe Covid-19 janë dy sëmundje të ndryshme që shkaktohen nga viruse të ndryshme. Gripi shkaktohet nga një familje virusesh të quajtur Orthomyxoviridae. Ndërkohë, Covid-19 shkaktohet nga një lloj specifik koronavirusi që u identifikua për herë të parë në 2019, dhe u quajt SARS-CoV-2. Ky i fundit përhapet më me lehtësi se sa viruset që shkaktojnë gripin.
Kështu, zhdukja e gripit në 2020-2021 nuk është mister, apo tregues se pandemia e Covid-19 ishte një konspiracion. Ajo është shpjeguar tashmë nga shkencëtarët si një efekt anësor i masave mbarëbotërore për parandalimin e përhapjes së Covid-19.
