Në njësinë administrative Sukth përfundoi rikonstruksioni i dy rrugëve të premtuara nga kryetarja e Bashkisë së Durrësit, Emiriana Sako. Rrugët u shërbejnë një komuniteti prej 850 banorësh, të cilët thonë se investime të tilla duhet të jenë të plota, ku të përfshihet ndërtimi i trotuareve dhe ndriçimi.
Në prill të këtij viti gjatë fushatës për zgjedhjet vendore të 14 majit, kandidatja për kryetare të Bashkisë së Durrësit, Emiriana Sako premtoi shtrimin e dy rrugëve në fshatin Vadardhë të njësisë administrative Sukth.
“Gjatë bashkëbisedimit me banorët e fshatit Vadardhë të njësisë administrative Sukth, iu bëra të ditur banorëve se së shpejti nis rikonstruksioni i rrugëve ‘Zef Ndreka’ dhe ‘Bosko’ me gjatësi 1.2 km.
Asfaltimi i këtyre rrugëve ka qenë kërkesë kryesore e banorëve të kësaj zone të cilën ne po e bëjmë realitet”, shkroi në Facebook kryebashkiakja e Durrësit.
Postimi i Sakos në Facebook, 23 prill 2023
Fillimisht, në lidhje me këtë premtim të Sakos, Faktoje iu drejtua me një kërkesë për informacion Bashkisë së Durrësit. Ne e pyetëm këtë institucion në lidhje me fazën e punimeve për rikonstruksionin e këtyre rrugëve dhe sa banorëve u shërbejnë këto rrugë.
Kërkesa për informacion dërguar Bashkisë Durrës, 12 tetor 2023
Në përgjigjen zyrtare për Faktoje që mban datën 19 tetor 2023, konfirmohet se rrugët janë në fazën e kolaudimit.
“Rikonstruksioni i rrugës ‘Zef Ndreka’ në njësinë administrative Sukth është në fazën e kolaudimit Punimet e sistemit përfundimtar sipas kontratës priten të përfundojnë në fund të muajit tetor. Vlera e investimit të rrugës sipas kontratës është 7 217 280 lekë. Rruga u shërben 600 banorëve
Rikonstruksioni i rrugës ‘Bosko’ në njësinë administrative Sukth është në fazën e kolaudimit. Vlera e investimit të rrugës sipas kontratës është 3 016 800 lekë. Punimet e sistemit përfundimtar priten të përfundojnë në fund të muajit tetor. Rruga u shërben 250 banorëve”, njofton zyrtarisht Bashkia e Durrësit.
Për të parë ecurinë e punimeve, Faktoje bëri një verifikim në njësinë administrative Sukth më datë 20 tetor. Gjatë verifikimit konstatuam se asnjë prej rrugëve në njësinë administrative nuk mbante emër dhe gjetja e këtyre rrugëve ishte një sfidë më vete. Një banor me të cilin bisedoi Faktoje tha: “Kam 35 vite në Sukth dhe këto dy rrugë nuk i kam dëgjuar”.
Ne kërkuam ndihmën e njësisë administrative Sukth, për të gjetur vendndodhjen e tyre. Të dyja rrugët e lagjeve ishin përballë njëra-tjetrës, në një prej kryqëzimeve të fshatit Vadardhë në njësinë administrative Sukth.
Xhevahir Çaushi, specialist shërbimi në njësinë administrative Sukth dha detaje në lidhje me rikonstruksionin e rrugëve ‘Zef Ndreka’ dhe ‘Bosko’.
“300 metër linear është rruga ‘Bosko’, ndërsa rruga ‘Zef Ndreka’ është 900 metër. Para dy muajsh ka nisur puna për rikonstruksionin e tyre”, sqaroi ai.
Rruga Bosko, Sukth, 20 tetor 2023
Banorë të zonës thanë se shtrimi i këtyre rrugëve është një hap i mirë, por sipas tyre, duhet të ishin bërë trotuaret dhe të vendosej ndriçimi.
“Shyqyr që i shtruan rrugët, pavarësisht se duket sikur i kanë bërë copa-copa. Përshembull nuk ka trotuare anash rrugës, kanalet nuk janë mbyllur, ndriçim nuk ka. Megjithatë është një gjë e mirë që e bënë një hap të paktën. Ndoshta më vonë do i bëjnë dhe këto të tjerat”, thanë banorë të Sukthit për Faktoje.
Rruga “Zef Ndreka”, Sukth, 23 tetor 2023
Nisur nga verifikimi i kryer vendosëm që premtimin për rikonstruksionin e 2 rrugëve në Sukth ta kategorizojmë deri tani të mbajtur, por do të vijojmë monitorimin edhe pas përfundimit të kontratës së punimeve.
*Faktoje, e mbështetur nga National Endowment Democracy (NED) po monitoron 10 bashki në vend dhe po verifikon nëse janë mbajtur ose jo premtimet e dhëna nga kryebashkiakët.
