Pretendimi: Imazhi i Sali Berishës u projektua në kullën Rockefeller në New York nga diaspora shqiptare
Verdikti: E pavërtetë
————————————————————
Një video që po qarkullon në rrjete sociale pretendon se tregon imazhin e ish-kryeministrit Sali Berisha të projektuar në kullën Rockefeller në New York, ShBA. Video mban mbishkrimin: “Sali Berisha shfaqet në kullën Rockefeller New York. Faleminderit Diaspora Shqiptare. Zgjedhja juaj me 11 Maj tashmë është e qartë.”
Video e mësipërme është postuar fillimisht në rrjetet sociale Instagram, Facebook dhe Threads nga i njëjti person. Një numër mediash shqipfolëse e kanë marrë atë si të mirëqenë duke raportuar në mënyrë jo-kritike për “shfaqjen” e Berishës në New York.
Megjithatë, Faktoje gjeti se video e mësipërme nuk është reale. Ajo është gjeneruar me anë të një programi të inteligjencës artificiale (AI), specifikisht Openmagic.
Me anë të motorit të kërkimit pamor Google Lens, Faktoje gjeti një video të postuar nga llogaria e Openmagic në Instagram më 24 dhjetor, që promovonte një model të ri videosh që mund të përdoret për të gjeneruar video projeksionesh mbi kullën Rockefeller.
Siç mund të vërehet në krahasimin poshtë, vëmë re se këndi i xhirimit të të dyja videove është i njejtë. Çfarë spikat në veçanti, dhe tregon bindshëm se video e Berishës është gjeneruar me AI, janë kalimtarët në pjesën e poshtme të ekranit. Vëmë re se janë të njejtët ‘persona’, të gjeneruar nga programi AI.
