Lajmi, ku pretendohet se kryeministri Edi Rama ka “shkaktuar trazira në vend me deklaratën e tij” të mbajtur në Asamblenë Parlamentare të Këshillit të Evropës, është i pasaktë. “Faktoje” verifikoi këtë artikull që rezulton se është publikuar me një titull të ekzagjeruar për të mbledhur sa më shumë klikime.

Jona Plumbi

Marrëdhënia e Shqipërisë me Kosovën është një temë që ngjall interes tek lexuesit nga të dy anët e kufirit shqiptar. Për më tepër, shoqëruar me një titull që ka për qëllim krijimin e ndjesive të forta tek lexuesi për t’i shtyrë ata të klikojë lajmin, këto publikime bëjnë të kundërtën e asaj që një media ka për qëllim: informimin e saktë të publikut. I tillë është rasti i lajmit të publikuar më 12 tetor nga portali “on.news22link.com” dhe të shpërndarë nga faqe të ndryshme në Facebook, ku pretendohet se “Kryeministri Edi Rama me deklaratën e tij shkaktoi trazira në vend”.

Në të vërtetë, lajmi në brendi nuk flet për fjalimin e Kryeministrit Edi Rama në Asamblenë e Përgjithshme të Këshillit të Europës. Shkrimi tregon përgjigjen e kryeministrit të Kosovës, Albin Kurti, ndaj interesimit të gazetarëve, për ndjesinë e tij mbi deklaratat e Ramës. Kurti deklaroi se nuk kishte arritur ta dëgjonte fjalimin e Kryeministrit Rama, ndaj nuk mund ta komentonte atë.

Më tej ky shkrim, që duket se është një kopje e pjesshme e lajmit të publikuar në një tjetër media, sugjeron se fjalimi i Ramës ka sjellë reagime të shumta. “Mes shqiptarëve kryesisht lëvdata, ndërsa mes politikanëve serbë kryesisht kritika, e madje te disa edhe tronditje”. Kjo tregon se “të tronditurit” ndaj fjalimit të Kryeministrit Rama mund të jenë disa politikanë serbë, dhe jo dikush në Shqipëri, si sugjeron titulli abuzues i lajmit.

Shkrime të tilla, të kopjuara nga media të tjera dhe të publikuara me tituj abuzues dhe të pavërtetë, jo vetëm shkelin rregullat e të drejtave të autorit, por njëkohësisht, për qëllime fitimi ekonomik, ndikojnë në disinformimin e qytetarëve.