Këngëtarja Albërie Hadërgjonaj nuk punon si pastruese në SHBA, siç pretendohet në artikujt e shpërndarë në media. Faktoje verifikoi se kemi të bëjmë me një lajm të ricikluar dhe me titull abuziv, që ka si qëllim tërheqjen e klikimeve.
Një titull i shpërndarë online më 11 dhjetor premton një rrëfim të sinqertë të këngëtares shqiptare, Albërie Hadërgjonaj, ku thuhet se ajo punon si pastruese në SHBA.
“Këtu bën si me Ιek të mαdh/ Këngëtarja shqiptare pυnon ρastrυese nëρër shtëρi në Amerikë”-shkruan portali “Lajme Flesh”.
Titulli i përdorur ka një gjuhë fyese ndaj këngëtares, por ka arritur të mbledhë mbi 800 lexime në 24 orët e para të publikimit.
Artikulli i publikuar nga portali
Vetë ky artikull në brendësi të tij, thotë se aktualisht Hadërgjonaj punon ai agjente shitjesh së pronave, ndërsa punën si pastruese e ka bërë kur sapo ishte zhvendosur në Shtetet e Bashkuara të Amerikës.
Në lidhje me këtë artikull të publikuar, vendosëm të bëjmë një verifikim, fillimisht duke gjetur intervistën e dhënë nga artistja.
Nga kërkimi online rezulton se intervista është realizuar në maj të vitit 2018, ku ndër të tjera Albërie Hadërgjonaj është shprehur se në fillimet e saj në SHBA ka punuar edhe si dado apo si pastruese për të nisur jetën në një vend të ri.
“Kur kam shkuar në Amerikë unë kam qenë babysitter, kam pastruar shtëpi. Kam bërë gjithçka që një njeri do që të mbijetojë në një vend tjetër, sepse kjo ishte periudha e paraluftës”, shprehet ajo.
Më tej, në intervistën e më shumë se 5 viteve më parë, moderatori e pyet edhe nëse ende pastronte shtëpi.
“Tani jo, sepse emri më ka ndihmuar, më ka hapur dyert. Tani une shes shtëpia”, është shprehur këngëtarja Albërie Hadërgjonaj.
Artikuj të tillë, të ricikluar nga mediat online kanë si qëllim tërheqjen e sa më shumë lexuesve me tituj “bombastik” dhe dizinformues.
