Vaksinimi kundër Covid-19 nuk i shkaktoi paralizë dhe verbëri aktorit të ‘Hollywood’, Jamie Foxx. Pretendimet e paverifikuara u shpërndanë masivisht në rrjetet sociale, duke shërbyer si burim dizinformimi për lexuesit.
Postime të shpërndara në Facebook pretendojnë se aktori Jamie Foxx ka mbetur i paralizuar, pasi ka marrë vaksinën e Covid-19. Artikulli i shpërndarë nga përdoruesit në rrjetet sociale i jep zë një lajmi të publikuar në mediat italiane mbi gjendjen e yllit të “Hollywood”.
Screenshot, postimi i shpërndarë në rrjetet sociale
Nga një kërkim online rezulton se shkak për qarkullimin e këtij lajmi të paverifikuar ishte A.J.Benza, një podcaster, i cili më herët ka punuar për “New York Daily News”. Më 30 maj ai deklaroi në një program se aktori mbeti pjesërisht i paralizuar dhe i verbër, pasi mori një vaksinë të Covid-19. Sipas Benza, aktori u detyrua që të vaksinohej, teksa po xhironte një film.
Për këtë deklaratë të bërë, ai pretendon se iu referua një burimi, i cili e kishte informuar se Foxx kishte pësuar mpiksje gjaku, duke i shkaktuar ishemi. Dhe sipas tij, kjo kishte ardhur pasi ylli i ‘Hollywood’ ishte vaksinuar.
Përfaqësuesit e Foxx thanë në një email për mediat e huaja se pretendimi i Benzës është “plotësisht i pasaktë”. Foxx u shtrua në spital në prill, për një sëmundje të pazbuluar deri në atë kohë.
Vajza e tij Corinne Foxx deklaroi në një postim në ‘Instagram Story’ se prej javësh ai kishte lënë spitalin dhe ishte në shtëpi. Sipas vajzës, gjendja e tij ishte e mirë, mjaftueshëm për të luftuar ‘pickleball’ (një lojë e ngjashme me tenisin).
Një verifikim i fakteve nga “Healthfeedback.org” arriti në përfundimin se aktualisht nuk ka asnjë provë që aktori Jamie Foxx ka mbetur i paralizuar dhe i verbër për shkak të një mpiksje gjaku në tru pas vaksinimit kundër Covid-19.
Studime të shumta kanë treguar se rreziku i çrregullimeve të koagulimit të gjakut, si dhe problemeve të tjera shëndetësore, është shumë më i lartë pas kontraktimit të infeksionit Covid-19, sesa pas vaksinimit kundër tij.
