Një artikull i parë mbi 3 mijë herë në Facebook jep lajmin e kobshëm për një “aksident të tmerrshëm”. Një verifikim i shpejtë nga “Faktoje” zbuloi se ky lajm është ricikluar për klikime nga mbi një vit më parë.

Ajo çka ngjall fillimisht dyshime për vërtetësinë e këtij lajmi janë gabimet e shumta drejtshkrimore në titullin “Ak si.dent i tm ershëm/ Furgoni del nga rruga 5 persona h umbin jetën, një vajz e v ogël…” Titulli i papërfunduar është gjithashtu një tregues se lajmi ka për qëllim kryesisht mbledhjen e klikimeve dhe jo informimin e publikut.

Si rrjedhojë, “Faktoje” vendosi të verifikojë vërtetësinë e këtij lajmi duke përdorur fillimisht mjetin TinEye, i cili përdoret për të kërkuar një imazh në internet. Nga kërkimi i TinEye rezultoi se imazhi i përdorur në artikull ishte shfaqur për herë të parë në internet në Gusht të 2021, dhe ishte kapur nga një video reportazh i Top News, në po atë datë.

Aksidenti, i cili pretendohet në artikull se ka ndodhur së fundmi, në fakt ndodhi në 26 gusht 2021, kur një përplasje mes një automjeti dhe një furgoni në rrugën nacionale Gjirokastër-Sarandë ka çuar në daljen nga rruga të këtij të fundit. Si pasojë kanë humbur jetën pesë persona. Fatmirësisht, një vajzë është arritur të nxirret e gjallë nga mjeti që kishte rënë në greminë.

Riciklimi i lajmeve të tilla synon mbledhjen e klikimeve duke shfrytëzur kuriozitetin e audiencave. Si pasojë, ama, kur bëhet fjalë për tragjedi të tilla njerëzore, ringjallin edhe dhimbjen tek të afërmit e viktimave. A është moralisht e justifikueshme të përdoret shqetësimi dhe ankthi që krijohet tek publiku prej këtyre lajmeve, për të marrë sa më shumë klikime?