Më shumë se 40 mijë klikime në katër ditë ka marrë një shkrim i publikuar në rrjet nga exprsnews.com, edhe pse lajmi mbi ngjarjen e rëndë – ku në një aksident rrugor në Xhenova të Italisë u përfshinë gjashtë makina dhe pati disa viktima – në fakt është riciklim i një lajmi të vjetër. Në të vërtetë aksidenti ka ndodhur dy vjet më parë dhe është raportuar gjerë në media edhe për shkak të përfshirjes në aksident të disa shqiptarëve.
Jona Plumbi
Lajmet që publikohen nga media online me qëllim mbledhjen e klikimeve shpesh herë nuk kursejnë as tragjeditë me humbje jetësh. I tillë është rasti i lajmit të publikuar nga “exprsnews.com” në datën 20 Tetor 2022, me titull sensacional “Mos kalo pa dhënë ngushëllime/ E rende! Familja shqiptare përfshihet në aksident tragjik, 6 makina bëhen copash, mrekullia e shpëton 2-vjeçaren, prindërit e saj në gje ndje kritike”.
Faktoje verifikoi se lajmi flet për një ngjarje që ka ndodhur në 12 Gusht 2020, pra dy vjet më parë, në autostradën e Xhenovas në Itali.
Lajmi i publikuar fillimisht në mediat e vendit fqinj, u pasqyrua edhe në mediat shqiptare për shkak të faktit që tre anëtarë të një familjeje shqiptare u përfshinë në aksidentin në fjalë.
Risjellja e lajmeve tronditëse me qëllim mbledhjen e klikimeve, duke përfituar nga ndjeshmëria që tema të tilla shkaktojnë tek çdo qytetar, jo vetëm dizinformon lexuesit por njëkohësisht shfrytëzon tragjedi njerëzore për përfitime personale.
Shfrytëzimi i tragjedive me humbje jete është praktikë e vazhdueshme e portaleve online që synojnë klikime dhe jo krijimin e besueshmërisë tek lexuesit përmes informacioneve të vërteta. Riciklimi i ngjarjeve të rënda për arritjen e shikueshmërisë së lartë mund të shkaktojë shqetësim të panevojshëm tek lexuesit si dhe ringjallje të dhimbjes tek familjarët e viktimave.
*Lajmi publikohet në kuadër të bashkëpunimit mes Faktoje dhe Facebook për të luftuar dizinformimin
