Aeroporti i Korçës ‘realitet’ vetëm në 3D

764

Pas një dekade në krye të Bashkisë së Korçës, teksa synonte mandatin e fundit në zgjedhjet vendore të 14 majit, Sotiraq Filo nxorri nga sirtarët e premtimeve ndërtimin e aeroportit Turistik dhe Sportiv në Korçë. Në fushatë Filo premtoi se aeroporti do të ishte një realitet i prekshëm së shpejti. Verifikimet e Faktoje tregojnë se puna për ndërtimin e aeroportit me vlerë 1.1 milionë euro do të kërkojë të paktën dy vite. 

Esmeralda Topi 

‘…Ndërtimi i Aeroportit së shpejti do të jetë një realitet i prekshëm që do t’i japë një shtysë të madhe zhvillimit të turizmit rajonal dhe sporteve të aventurës.’, premtonte në prag të zgjedhjeve lokale të 14 majit, Sotiraq Filo, kandidat i Partisë Socialiste, fitues i mandatit të tretë për kreun e bashkisë Korçë. 

Postimi i kryetarit të Bashkisë së Korçës

Postimi që mban datën 8 maj 2023 shoqërohet me një video 3D e cila tregon se si do të duket aeroporti Turistik dhe Sportiv në Korçë. Klipi ka marrë qindra reagime nga ndjekës të kryebashkiakut të Korçës në profilin e tij zyrtar në Facebook. 

Së shpejti, po kur?

Më 13 shtator, ne iu drejtuam me një kërkesë për informacion Bashkisë së Korçës, lidhur me ecurinë e këtij projekti madhor, që sipas kryetarit Sotiraq Filo do të përfundonte së shpejti. 

Kërkesa drejtuar Bashkisë Korçë për Aeroportin

Por pyetjet tona nuk morën përgjigje shteruese nga Bashkia e Korçës. Institucioni thotë se ende po punohet për Aeroportin, teksa pranon se afati për kryerjen e punës në këtë projekt është 18 muaj nga nisja e tyre. 

‘Sipas të dhënave të marra nga Drejtoria e Planifikimit dhe Kontrollit të Zhvillimit të Territorit, për aeroportin turistiko-sportiv po punohet ende. Vlera e objektit është 99.999.999 lekë. Ky projekt financohet nga FSHZH-ja dhe afati për kryerjen e punimeve është 18 muaj nga nisja e punimeve.’, shkruhet në përgjigjen e Bashkisë.

Projekti me vlerë 1.1 milionë euro (me TVSH) është financuar nga Fondi Shqiptar i Zhvillimit. FSHZH pohon për Faktoje se aktualisht po punohet për ndërtimin e godinës së administratës, godinës së zjarrfikësve, kullën e vrojtimit dhe hangarët e avionëve që do fluturojë aty.

“Lidhur me aeroportin turistiko – sportiv në Korçë, financim me vlerë totale 112,285,296 lekë me T.V.SH, ju informojmë se punimet për implementimin e tij kanë filluar më datë 04.07.2023 dhe po punohet për ndërtimin e godinës së administratës, godinës së zjarrfikësve, kullën e vrojtimit dhe hangarët e avionëve që do fluturojë aty.”, shkruhet në përgjigjen e FSHZH-së pas një kërkese për informim.

Fondi Shqiptar i Zhvillimit thotë se punimet për ndërtimin e aeroportit do të zgjasin dy vite, 6 muaj më shumë nga ç’deklaron Bashkia e Korçës. 

“Më tej, pritet të fillojë puna për zonën e parkimit dhe zonën e depozitimit të naftës. Afati i realizimit të punimeve është 24 muaj nga fillimi i tyre.”konfirmon FSHZH. 

Alket Islami, nga Shoqata e Aeronautikës e sheh me shumë interes realizimin e këtij projekti. 

“Në nivelin sportiv aty ka mundësi për kryerjen e shumë aktiviteteve të sporteve të ajrit si balloning, ultralight paragliding, aeromodeling etj. Në nivel turistik është një portë hyrëse shumë e rëndësishme në të gjithë periudhën e vitit me turistë që vijnë me avionë të vegjël. Ky aeroport do të funksionojë edhe për emergjencat e ndryshme kombëtare me vend bazimin e mjeteve për këto operacione.”, shprehet Islami për Faktoje.

Verifikimi në terren

Më 26 tretor Faktoje udhëtoi drejt Korçës për të parë nga afër ecurinë e punimeve të këtij projekti. Aeroporti po ndërtohet vetëm 7.5 km larg Korçës, në fshatin Lumalas. 

Lumalas, 26 tetor

Vendi ishte i rrethuar nga një gardh me rrjetë dhe sipërfaqja e tokës ishte niveluar. Nga larg dallohej një godinë dykatëshe ende në ndërtim, një eskavator i verdhë dhe disa tabela të vogla sinjalistike. Këto ishin të vetmet shenja dalluese të punimeve në Lumalas të enjten e 26 tetorit.  

Lumalas, 26 tetor

Verifikimi në terren tregon se puna për ndërtimin e një aeroporti si ai i videos 3D që premtonte Filo përpara zgjedhjeve, është ende shumë larg. 

Premtim i ricikluar 

‘Do të jetë një aeroport për fluturime fillimisht turistike dhe sportive në një pistë me bar ku mund të ulen avionë deri më 12 vendesh. Është një projekt që do të na mundësojë të organizojmë këtu shumë aktivitete.’, shprehej Filo në gusht të 2022, teksa premtonte se fluturimet e para nga aeroporti do të nisnin vjeshtën e po atij viti. 

Por ky nuk është i vetmi premtim i shkelur për këtë projekt. Prej një decade, në krye të Bashkisë së Korçës, Sotiraq Filo ka të paktën dy palë zgjedhje që riciklon të njëjtin premtim. I vetmi ndryshim me zgjedhjet e 2019, nështë se për vendoret e 14 majit, Filo iu prezantoi qytetarëve edhe një projekt 3D për Aeroportin. 

Video 3D e shpërndarë nga kryetari i Bashkisë së Korçës

Përfundim 

Bazuar në informacionet e mbledhura dhe verifikimet në terren, premtimin e kryetarit të Bashkisë së Korçës, Sotiraq Filo, se aeroporti do të ishte një realitet i prekshëm së shpejti, do ta kategorizojmë të pambajtur. 

*Faktoje, e mbështetur nga National Endowment Democracy (NED) po monitoron 10 bashki në vend dhe po verifikon nëse janë mbajtur ose jo premtimet e dhëna nga kryebashkiakët.