Pretendimi: Vladimir Putin nuk kërcënoi së fundi nisjen e luftës nëse Ukraina hyn në NATO
Verdikti: Missing context
Deklarata e presidentit rus, Vladimir Putin, ku kërcënon Europën nëse Ukraina hyn në NATO, i përket vitit 2022. Faktoje hedh poshtë pretendimet që qarkullojnë në rrjetet sociale se video është xhiruar së fundmi.
Një video është shpërndarë në rrjetet sociale në vendin tonë, ku pretendohet se presidenti rus, Vladimir Putin ka kërcënuar Europën, nëse Ukraina hyn në NATO.
“Putin drejtuar NATO-s për dërgimin e forcave në Ukrainë: ‘Bëje dhe nuk do të kesh kohë as të mbyllësh sytë’! Presidenti rus Vladimir Putin me një deklaratë të rrufeshme bëri të qartë se çfarë do të ndodhë me evropianët nëse Ukraina hyn në NATO dhe Kievi për të rezistuar kërkon aktivizimin e nenit 5 për ‘ndihmën aleate.”-shkruajnë përdorues në rrjetet sociale.
Kjo video u shpërnda në rrjet pas deklaratës së fundit të presidentit francez Emanual Macron, i cili nuk përjashtoi në një takim publik angazhimin me trupa të NATO-s në Ukrainë.
Postimet e shpërndara në rrjetet sociale
Faktoje vendosi të bëjë një verifikim të këtyre pamjeve, fillimisht duke përdorur mjeteve e verifikimit të fotove dhe videove, për të kuptuar burimin e saj.
Nga kërkimi rezulton se në fakt video i përket shkurtit të vitit 2022, disa javë para se Rusia të niste sulmet ndaj Ukrainës. Reuters raportoi më 7 shkurt 2022, se Putin u takua me presidentin francez Emmanuel Macron në Moskë, ku ai bëri këto komente.
“Sigurisht që potencialet e NATO-s dhe Rusisë janë të pakrahasueshme. Ne e kuptojmë këtë. Por ne gjithashtu e kuptojmë se Rusia është një nga shtetet kryesore bërthamore dhe për nga disa komponentë modern ajo madje i tejkalon shumë. Nuk do të ketë fitues. Dhe ju do të tërhiqeni në këtë konflikt kundër vullnetit tuaj”, thotë ndër të tjera lideri rus.
Videoja që po qarkullon në mediat sociale është prodhuar nga tabloidi britanik “Daily Mail” dhe është publikuar më 8 shkurt 2022.
Pra, videoja që tregon Putinin duke bërë komente është e shkurtit të vitit 2022 dhe deklarata është bërë para pushtimit rus të Ukrainës. Nuk kemi të bëjmë me një deklaratë aktuale, siç pretendohet në rrjetet sociale. Pretendimi është verifikuar edhe nga kolegët e “Reuters”.
