Pamjet e arrestimit të fëmijëve palestinezë nga ushtarët izraelitë po përdoren në media si video nga zhvillimet aktuale të luftës mes dy shteteve. Faktoje sjell të dhënat që tregojnë se video i përket vitit 2021.
Rrëmbimi i fëmijëve izraelitë për t’u mbajtur peng nga luftëtarët e Hamasit, është një lajm i rëndë që tërheq klikime në internet. Këtë interes kanë shfrytëzuar edhe përdorues në rrjetet sociale, të cilët po ndajnë video që pretendohet se dëshmojnë këto rrëmbime apo mbajtjen e burgosur të fëmijëve. Në disa raste edhe mediat kanë rënë preh e këtyre videove duke shpërndarë dizinformim.
Një nga këto raste është edhe një video e shpërndarë në 10 tetor nga portali “Periskopi.com”. “Grupet terroriste të Hamasit keqtrajtojnë dhe marrin peng shumë fëmijë izraelit (PAMJE TË RËNDA)”, titullohet lajmi që shoqëron videot.
Artikulli i shpërndarë nga mediat
Faktoje vendoi të bëjë një verifikim të pamjeve, nëpërmjet mjeteve të verifikimit të fotove dhe video. Nga kërkimi rezulton se video e tretë në këtë artikull, në fakt nuk i përket zhvillimeve aktuale nga konflikti Izrael-Palestinë. Pamjet e fëmijës që rrëmbëhet janë të marsit të vitit 2021.
Në këto pamje tregohet arrestimi i fëmijëve palestinezë nga ushtarët izraelitë.
“Ushtarët izraelitë arrestuan 5 fëmijë palestinezë në kodrat e Hebronit jugor të mërkurën, pasi u raportua se ata kishin kaluar rrethimin në mënyrë të paligjshme. 5 fëmijët, të cilët variojnë nga mosha 8 deri në 13 vjeç, thuhet se u mbajtën për tre orë në stacionin e policisë Kiryat Arba përpara se të liroheshin.
Dy nga fëmijët, 12 dhe 13 vjeç, janë thirrur për pyetje shtesë të dielën, sipas avokatit të fëmijëve Gaby Lasky”, raportonin mediat e huaja në 10 mars të vitit 2021.
Benjamin Netanyahu i shpall zyrtarisht luftë Hamasit më 8 tetor, pas një sulmi të befasishëm nga militantët e Hamasit që erdhi një ditë pas 50-vjetorit të Luftës së Yom Kipur ose Lufta Arabo-Izraelite. Izraeli deklaron se të paktën 900 izraelitë janë vrarë nga Hamasi, mes tyre gra, fëmijë dhe të moshuar.
