SHEFKIJE ALASANI
Turizmi është një ndër sektorët që më së shumti u godit nga pandemia globale e COVID-19. Buxheti dhe ekonomia e qyteteve që gravitojnë rreth Liqenit të Ohrit u prekën direkt nga masat kufizuese për parandalim ndaj COVID-19. Shifra e turistëve që vizituan qytetin e Strugës në vitin 2019 u përgjysmua në vitin 2020. Me të njëjtin realitet përballet dhe qyteti i Pogradecit në Shqipërinë fqinje. Rimëkëmbja e sektorit turistik në qytetet buzë Liqenit të Ohrit duket e vështirë edhe gjatë vitit 2021, shkruan Portalb.mk.
Kriza e shkaktuar nga COVID-19, në botë, por edhe në vendet e rajonit, ka prekur më së shumti sektorin e turizmit. Të ardhurat nga turizmi janë ndër burimet kryesore për qytetet që gravitojnë rreth Liqenit të Ohrit. Në këtë zonë turizmi siguron veprimin e shumë bizneseve por edhe ekzistencën e shumë familjeve. Struga është destinacioni i dytë më i vizituar në Maqedoninë e Veriut, pas Ohrit, e jo më pak i dashur për turistët është edhe qyteti i Pogradecit buzë Liqenit të Ohrit në Shqipëri. Gjatë vitit 2019 në Strugë kanë qëndruar 106 406 turistë, prej të cilëve 52 372 janë turistë vendas dhe 54 034 turistë të huaj. Si pasojë e pandemisë, në vitin 2020 numri i pushuesve në Strugë u përgjysmua. Në vitin 2020 në Strugë janë regjistruar gjithsej 62 484 turistë, prej të cilëve 54 930 janë turistë vendas dhe vetëm 7 554 turistë të huaj.
Numri i turistëve të huaj dhe qëndrimeve në Strugë për vitin 2019
Numri i turistëve të huaj dhe qëndrimeve në Strugë për vitin 2020
Shifrat në sektorin turistik janë dëshpëruese edhe në Shqipëri.
Sipas analizave të INSTAT në tremujorin e tretë të vitit 2020 numri i vizitorëve gjithsej është ulur me 43,3 %, në krahasim me tremujorin e tretë 2019 ndërsa numri i netë qëndrimeve gjithsej është ulur me 44,9 %, në krahasim me tremujorin e tretë 2019. Të dhënat e INSTAT tregojnë se gjatë vitit 2020 numri i vizitorëve të huaj është ulur me 59,3 %, në krahasim me tremujorin e tretë të vitit 2019.
Burimi: instat.gov.al
Sa është premtues sezoni i veror 2021 për turizmin në Liqenin e Ohrit?
Në prag të fillimit të sezonit veror, rimëkëmbja e sektorit të turizmit duket e vështirë. Edhe pse sektori i turizmit fiton më shumë nga turistët e huaj, me sa duket edhe këtë vit hotelet do të punojnë kryesisht me turistë vendor apo lokalë. Turistët e huaj pritet më së shumti të vinë nga vendet fqinje ndërsa mikpritja e turistëve nga vendet e ndryshme të botës edhe këtë vit pritet të jetë e ulët.
“Sektori më i goditur nga pandemia është turizmi. Humbjet e këtij sektori gjatë vitit 2020 dhe gjysmës së vitit 2021 arrijnë deri në 98%. Jemi shumë pesimist për sezonin e ri veror duke pasur parasysh situatën me pandeminë dhe nevojën që turizmi të merret më seriozisht de të ketë mbështetje thelbësore. Nuk kemi asnjë paralajmërim për ardhjen e turistëve të huaj. Nga muaji në muaj shtyhen planet nga operatorët e huaj turistik. Akoma nuk kemi paralajmërime pozitive”- u shpreh për portalb.mk Asim Medjedovic, drejtori i agjencisë “Fibula Air Travel”-Ohër.
Operatorët turistik në Strugë dhe Ohër presin ndihmë pa kushte dhe thelbësore për sektorin turistik. Ato kanë disa kërkesa të cilat presin të realizohen sa më shpejtë nga autoritetet.
“Lehtësim dhe modernizim i rregullores për subvencionim, vënia në funksion e Komitetit për turizëm me të cilin kryeministri duhet të mundësojë fushatë aktive diplomatike në vendet nga ku në të kaluarën na kanë ardhur shumë turistë. Këto kërkesa janë dërguar nga ana e të gjithë organizatave dhe odave turistike dhe institucionet duhet sa më shpejtë të reagojnë për shkak se sezoni veç më është humbur, të mos lejojmë të dështojmë komplet”, thekson Asim Medjedovic.
Foto nga Portalb.mk/Suad Bajrami
Nga ana tjetër, udhëheqësit dhe operatorët turistik shprehen të shqetësuar për rrjedhën e ngadalshme të procesit të vaksinimit në Maqedoninë e Veriut.
“Kemi filluar të pranojmë disa rezervime por është shumë larg nga ajo që presim. Me sa duket edhe këtë vit tregu kryesor do të jetë tregu vendor por ne shpresojmë se gjërat do të përmirësohen dhe presim që të hapen kufijtë. Hoteli jonë ka 207 dhoma por ne nuk presim të punojmë me kapacitet maksimal këtë vit. Ne presim nga shteti mbështetje të pakushtëzuar për këtë sektor, rroga, asistencë financiare të pakthyeshme për sektorin turistik dhe test PCR falas për turistët e huaj. Madje duhet vaksinuar i gjithë stafi i hotelit që turistët të ndihen të sigurt, përderisa shumë vende thuajse kanë përfunduar me vaksinimin Maqedonia e Veriut është akoma në fillim të procesit” –Aysegul Onder, menaxhere e hotel “Izgrev” në Strugë.
Në Maqedoninë e Veriut sektori i turizmit dhe gastronomisë po proteston para qeverisë me qëllim që autoritet ti përmbushin kërkesat e tyre. Në pakon e gjashtë të masave për gastronomët janë rezervuar 10 milion euro, e megjithatë kjo paket nuk përmbush kërkesat e këtij sektori. Gastronomët janë të mendimit se masat e shtetit do të kontribuojnë në zbutjen e pasojave, por pretendojnë se fondet e parashikuara janë larg nga ato që u duhen aktualisht për të shpëtuar sektorin turistik.
Ndryshe nga Struga, hotelierët në Pogradec shprehen optimist për sezonin veror 2021. Ata shprehen se këtë vit mendojnë të punojnë me kapacitete të plota dhe se rezervimet kanë filluar si nga turistë të huaj ashtu edhe nga turistë vendas.
Foto nga Portalb.mk/Suad Bajrami
“Sigurisht që pati ndikim negativ, në përgjithësi të gjitha fushat e jetës por më së shumti turizmi, po ashtu pati rënie të ndjeshme në qytetin e Pogradecit, gjithashtu dhe në hotelin tonë. Ne jemi optimistë që ky sezon do të jetë i mire dhe i mbarë, pasi kanë filluar rezervimet nga turistë të huaj dhe vendas”, u shprehen për portalb.mk Jurgen Hamolli nga menaxhmenti i hotelit “Hyrmeti’s Palace” në Pogradec.
Imunizimi global është shpresa e vetme që ky sektor të rikthehet në normalitet. Pronarët e hoteleve kërkojnë që stafi i tyre të ketë përparësi në procesin e vaksinimit me qëllim që ndihen të sigurt turistët.
A ka strategji lokale Struga dhe Pogradeci për rimëkëmbjen e turizmit?
Të dhënat nga njësia e turizmit në Komunën e Strugës tregojnë se sektori i turizëm-hotelerisë është sektori më i prekur nga pandemia.
“Padyshim, edhe vendi jonë, si destinacion turistik, nuk qe imun ndaj pandemisë dhe ende është nën ndikimin negativ që solli me vete ky fenomen global. Struga është destinacioni i dytë më i vizituar në Republikën e Maqedonisë së Veriut. Ashtu sikurse i gjithë rajoni më i gjerë turistik, edhe Struga ra nën ndikimin e pandemisë Kovid-19. Këto efekte janë më se të dukshme, sidomos në sektorin e turizëm-hotelerisë, i cili është në front të “luftës me armikun e padukshëm”. Kishte periudha kur sektori i turizëm-hotelerisë u mbyll tërësisht, por kishte edhe periudha kur ky sektor u hap tërësisht dhe funksionoi me kapacitete të plota dhe të stërmbushura” – deklaroi Armend Pushkule nga njësia e turizmit në Komunën e Strugës.
Nga Komuna e Strugës thonë se nuk kanë strategji lokale për rimëkëmbjen e turizmit në këtë qytet dhe se mbështeten në strategjinë kombëtare në luftën me COVID19. Ndryshe nga Struga, nga Bashkia e Pogradecit bëjnë të ditur se po punohet për Strategjinë lokale të zhvillimit të Turizmit sigurisht duke u referuar dhe tek Strategjia Kombëtare për Zhvillimin e Turizmit të Qëndrueshëm. Ndërkohë, në Pogradec është pastruar vija bregliqenore, duke dyfishuar sipërfaqen publike në zonën e plazhit ku qytetarët dhe turistë kanë mundësi të pushojnë duke respektuar në këtë mënyrë dhe rregullat e distancimit social.
“Në bazë të statistikave të parashtruara nga operatorët turistikë por edhe nga Zyra e Informacionit Turistik, ndryshimi i numrave të vizitorëve në Pogradec vihet re sepse kanë ndikuar masat e mara dhe fashat e orarit për të parandaluar përhapjen e COVID19. Bashkia Pogradec është duke hartuar Draftin e I-rë për Strategjinë lokale të zhvillimit të Turizmit sigurisht duke u referuar dhe tek Strategjia Kombëtare për Zhvillimin e Turizmit të Qëndrushem. Duke shpresuar që vaksinimi masiv të sjellë një klimë pozitive ndaj frekuentimit të turistëve në rajonin e Liqenit të Ohrit por edhe me gjerë dhe institucionet do kenë mundësi të konceptojnë Planin e Veprimit për të rritur numrin e turistëve.”- deklaruan nga Bashkia e Pogradecit për Portalb.mk.
Foto nga Portalb.mk/Suad Bajrami
Çfarë kapaciteti akomodues e mikpritës disponon Struga dhe Pogradeci?
Në Strugë ka kapacitete akomoduese për akomodim të 8-10 mijë turistë në ditë, që do të thotë se disponon me 4000 dhoma me 8-10 mijë shtretër (hotele, motele, autokampe, dhoma, apartamente, shtëpi dhe lloje tjera të akomodimit). Në tërë territorin e Strugës funksionojnë 60 restorante me karakter tradicional dhe bashkëkohor, 50 fast-food kapacitete dhe 60 kafeteri bashkëkohore për të gjitha preferencat dhe 20 agjenci turistike për organizim të udhëtimeve të turistëve.
Në anën tjetër të kufirit, në Pogradec aktualisht operojnë 35 hotele me rreth 2000 shtretër. Vlen të përmendet edhe fakti se një peshë të rëndësishme në Pogradec ka turizmi familjar, që funksionon gjatë periudhës së sezonit turistik veror, nga ana tjetër vlen të theksohet fakti se familjarë nga qytete të tjera të Shqipërisë, kanë blerë banesa në Pogradec, të cilat i frekuentojnë vazhdimisht gjatë periudhës maj-tetor duke nxitur në këtë aspekt dhe diversitetin e turizmit.
Foto galeri nga Liqeni i Ohrit
