Pretendimi: Kjo video tregon tabelën e famshme me mbishkrimin Hollywood duke u djegur
Verdikti: E pavërtetë
—————————————————————
Në rrjetet sociale shqipfolëse po qarkullon një video që duket se tregon tabelën e famshme Hollywood në Los Angeles të përfshirë nga flakët, pas zjarreve që pushtuan shtetin amerikan të Kalifornisë duke vrarë 24 persona dhe shkatërruar lagje të tëra.
Megjithatë, video e mësipërme me gjasa është gjeneruar me anë të programeve kompjuterike të inteligjencës artificiale (AI).
Tabela e famshme, siç mund të vërehet në transmetimin drejtpërdrejt të pamjeve të saj, mbetet e paprekur deri në shkrimin e këtij artikulli.
Një numër postimesh në rrjete sociale gjithashtu konfirmojnë se tabela Hollywood nuk është dëmtuar nga flakët.
Disa raportime përmendin një zjarr në Hollywood Hills, i quajtur zjarri “The Sunset”, i cili përbënte një kërcënim për monumentet e Los Angeles.
Megjithatë, ky zjarr u përhap në 42.8 hektarë tokë dhe më 13 janar është kontrolluar plotësisht, sipas faqes së Departamentit të Pyjeve dhe Mbrojtjes nga Zjarri të Kalifornisë.
Në Google Maps, ku aktualisht po shfaqen edhe zonat e prekura nga zjarret, vëmë re se tabela Hollywood ndodhet larg të tre zjarreve kryesore në Palisades, Hurst dhe Eaton.
Jeff Zarrinnam, kryetar i Hollywood Sign Trust, konfirmoi për LA Times se tabela është ende në këmbë dhe është e paprekur.
Kur Zarrinnam, një banor i lagjes Hollywood Hills, mori alarmin për të evakuuar zonën, ai qëndroi pas për të vëzhguar shtëpinë e tij dhe tabelën historike që ai mund ta shohë qartë nga rezidenca e tij.
“Asgjë nuk po ndodhte brenda apo rreth vetë tabelës Hollywood,” tha ai. “Zjarri ishte në perëndim të autostradës 101 dhe tabela Hollywood është në lindje të autostradës 101.”
