Pretendimi: Spanja ka nisur të heqë kartmonedhën 50 euro nga qarkullimi
Verdikti: E pavërtetë
—————————————————–
Në fillim të Prillit 2025, një numër mediash dhe portalesh shqipfolëse raportuan se Banka Qendrore e Spanjës ka urdhëruar tërheqjen nga qarkullimi të kartëmonedhave 50 euro duke filluar nga ky muaj.
Artikujt e mësipërm i referohen medias spanjolle 20minutos.es, e cila botoi më 7 prill një artikull me titullin “Këto janë kartëmonedhat dhe monedhat, ditët e të cilave janë të numëruara… por ja si mund t’i shkëmbeni në Bankën e Spanjës.”
Megjithatë, Banka Qendrore e Spanjës ka konfirmuar po atë ditë se nuk ka urdhëruar tërheqjen e asnjë kartëmonedhe, se të gjitha kartëmonedhat mund të vazhdojnë të përdoren si zakonisht dhe se asnjëra prej tyre nuk do të humbasë vlerën.
Njoftimi i bankës shpjegon se nga mund të ketë ardhur konfuzioni. Si pjesë e aktiviteteve të saj të përditshme, banka qendrore kontrollon në mënyrë rutinore origjinalitetin dhe cilësinë e kartëmonedhave që kthehen nga institucionet e kreditit.
Kartëmonedhat dhe monedhat e gjykuara se nuk janë në gjendje të përshtatshme tërhiqen, asgjësohen dhe zëvendësohen me të reja, ndërsa ato në gjendje të mirë hidhen sërish në qarkullim.
Banka e Spanjës tha se e bën këtë për të gjitha prerjet, jo vetëm për ato 50 euro, dhe theksoi se edhe nëse një kartëmonedhë dëmtohet, ajo nuk e humb vlerën e saj dhe mund të këmbehet me një të re.
“Një arsye për t’i mbajtur kartëmonedhat në gjendje të mirë është për ta bërë më të lehtë kontrollimin e veçorive të tyre të sigurisë”, tha banka. “Edhe pse kartëmonedhat janë bërë që të zgjasin, ato zakonisht tregojnë shenja konsumimi me kalimin e kohës nga përdorimi i rregullt”.
Banka Qendrore Europiane (ECB) konfirmoi gjithashtu për EuroVerify se “as Banco de España [Banka e Spanjës] dhe asnjë bankë tjetër qendrore brenda zonës së euros nuk ka urdhëruar tërheqjen e ndonjë kartëmonedhe apo monedhe euro. Të gjitha kartëmonedhat euro ruajnë vlerën e tyre dhe mbeten në qarkullim.”
