Një lajm i botuar në 16 janar të këtij viti raporton aksidentin tragjik të ndodhur në Greqi, ku një familje shqiptare me pesë anëtarë ka ndërruar jetë. Verifikimi i “Faktoje” zbuloi se ky lajm është ricikluar nga viti 2021 dhe kjo nuk është hera e parë që ngjarja tragjike e ndodhur në Lamia të riciklohet nga portalet për të marrë klikime.
“Tragjedi për familjen shqiptare në Greqi, babai, nëna, vajza dhe dy djemtë ndërrojnë jetë në aksident,” është titulli i artikullit të publikuar më 16 janar nga portali newstime24online.
Artikulli, në brendësi, përshkruan se si ka ndodhur aksidenti tragjik i familjes shqiptare në rrugët e Greqisë, duke e shoqëruar lajmin me një fotografi të një mjeti të aksidentuar rëndë në rrugë.
Më tej, portali ndan me lexuesit informacione të cunguara mbi identitetin e familjes së aksidentuar, ndërkohë që i gjithë shkrimi është i mbushur me gabime drejtshkrimore, përfshi edhe titullin.
Nga një verifikim i “Faktoje” rezulton se lajmi është ricikluar nga viti 2021. Aksidenti që i mori jetën familjes shqiptare ka ndodhur në nëntor të vitit 2021.
Ndërkohë nga kërkimet tona rezulton që edhe fotografia e përdorur për të ilustruar lajmin është e një aksidenti tjetër të ndodhur në Greqi, por në verën e vitit 2020.
Riciklimi apo keqpërdorja e lajmeve të tilla me tragjedi njerëzore publikohen shpesh nga portale jo serioze me qëllim që të tërheqin vëmendjen e lexuesve dhe të sjellin klikime pa u shqetësuar për ankthin dhe dhimbjen që mund t’u shkaktojnë familjarëve të viktimave.
