Pretendimi: Jose Mourinho vlerëson me superlativa Kombëtaren shqiptare
Verdikti: E pavërtetë
Jose Mourinho nuk i ka thurrur elozhe Shqipërisë, siç pretendohet në artikuj të shpërndarë masivisht në portale në vendin tonë. Verifikimet tregojnë se profili në rrjetin X nuk i përket portugezit, por është një llogari e krijuar nga fansa në emër të trajnerit.
Pa asnjë dyshim që pjesëmarrja e Shqipërisë në “Euro 2024” ka marrë gjithë vëmendjen e sportdashësve dhe jo vetëm. Së fundmi, në portale në vendin tonë ka qarkulluar masivisht një lajm ku pretendohet se një prej ikonave të futbollit, aktualisht trajner i Fenerbahçe, Jose Mourinho ka vlerësuar lojën e kuqezinjve në këtë kompeticion.
“Mourinho elozhe kuqezinjve: Shqipëria po thyen çdo parashikim. Na kishte munguar diçka e tillë, jeni kulmi i futbollit”-shkruajnë portalet.
Postimet e shpërndara në portale
Faktoje vendosi të bëjë një verifikim të këtij profili, për të parë nëse i përket vërtetë Jose Mourinho. Profili është me ‘tik’ blu, por kjo nuk do të thotë që është profili i tij, pasi gjatë një kërkimi të bërë në rrjetin X shihen se janë disa profile të verifikuara në emër të portugezit.
Veç kësaj, që në krye të faqes në rrjetin X shihet se janë shënuar dy emra, ai i Mourinho dhe i një tjetri ish-futbollisti, Rúben Amorim. Nëse profili do të ishte i trajnerit Mourinho, nuk kishte arsye që shkruhej edhe një emër tjetër krahas tij.
Profili ka 68 mijë ndjekës, shumë pak për një ikonë të futbollit si Jose Mourinho dhe postimet janë në vetë të tretë, një tregues tjetër që kemi të bëjmë me një llogari të krijuar nga fansat në emër të tij.
Gjithashtu, nëse do shohim komentet në postimin e bërë për Shqipërinë në këtë profil të rremë, vihet re se disa komentues e kanë evidentuar që llogaria nuk është e tij.
“Vëlla, ti je i famshëm në Shqipëri. Çdo portal mendon se Mourinho i vërtetë e ka shkruar këtë postim”, shkruan një prej komentuesve.
Jose Mourinho ka një profil në Instagram ku numëron më shumë se 5 milionë ndjekës, por në këtë llogari të tij nuk kishte asnjë postim ku ai të ketë përmendur Shqipërinë.
Kjo konfirmohet për Faktoje edhe nga gazetarë të sportit, të cilët e kanë mbuluar këtë fushë prej më shumë se 15 vitesh.
“Nuk është llogaria zyrtare e Jose Mourinho. Ka dhjetëra persona që blejnë ‘tick blu’ në Twitter mujor dhe duket si llogari zyrtare. Mourinho nuk ka Twitter/X, por vetëm Instagram”, sqaron Ermal Kuka, gazetar sporti.
Shënim: Data 25 qershor 2024 website Newsbomb ka korrigjuar lajmin, pas verfikimit të të Faktoje. Lajmit të raportuar i është ndryshuar vlerësimi fillestar në Facebook.
Shënim: Data 28 qershor 2024 website Koha Jonë ka korrigjuar lajmin, pas verfikimit të të Faktoje. Lajmit të raportuar i është ndryshuar vlerësimi fillestar në Facebook.
