Dorisa Parllaku
Prita mbi lumin Shkumbin që eviton përmbytjen e shtëpive dhe të mbjellave të 500 banorëve të fshtatit Thanasaj në Lushnje, duhet të kishte përfunduar. Kryetarja e re e bashkisë, Eriselda Sefa në muaji shkrurt 2022 premtoi se punimet do të përfundonin brenda 3 muajsh, por ato u shtynë për në qershor dhe ende po punohet për përfundimin e saj.
Shtëpitë e rreth 500 banorëve në fshatit Thanasaj në Lushnje vuajnë shumë prej viteve gjatë stinës së reshjeve, përmbytjet nga shtrati i lumit Shkumbin, duke shkaktuar dëme në tokat bujqësore deri në përmbytje të banesave.
Prej disa vitesh Merjemja është banore e këtij komuniteti. Ajo jeton me dy fëmijët e saj dhe prindërit e bashkëshortit na tregon vështirësitë që hasin gjatë dimrit.
“Gjatë dimrit nuk jetohet në këtë zonë, na vjen uji deri në derë të shtëpisë. Tokat që i përdorim për të mbjellat mbulohen nga uji njësoj sikur të kesh detin përpara. Dimrin e vitit 2017 për shkak të reshjeve të shumta, banesa jonë ishte e mbuluar nga uji. Fëmijët janë zgjuar të tmerruar nga gjumi dhe pyesnin të çoroditur se ku ndodheshin. Situata ka qenë me të vërtetë tmerruese për të gjithë banorët e zonës”- shprehet Merjemja me lot në sy.
Si pasojë e reshjeve të shumta në dimer, argjinatura e lumit Shkumbin është dëmtuar, çka sjell përmbytje të tokave bujqësore si dhe përmbytjen e banesave.
Kryetarja e bashkisë së Lushnjes, Eriselda Sefa gjatë fushatës zgjedhjeve të pjesshme vendore, u dha shpresë banorëve të zonës për ndërtimin e pritës mbi lumin Shkumbin.
“Ndërtimi i pritës mbi lumin Shkumbin, nuk është lajmi i vetëm i mirë. Dua të ndaj me banorët e këtij komuniteti edhe lajmin e gëzuar se shumë shpejt do të nisin punimet për asfaltimin e rrugës”- premtoi Sefa gjatë një bashkëbisedimi me banorët e fshatit Thanasaj në shkurt të vitit 2022.
Screenshot nga postimi i Eriselda Sefës në Facebook
Krahas premtimit në profilin e saj u publikua dhe nje foto e cila tregonte nisjen e punimeve për ndërtimin e pritës mbi lumin Shkumbin.
Screenshot nga postimi i Eriseda Sefës në Facebook, data 20 shkurt 2022
3 muaj pas premtimit
Faktoje vendosi të verifikojë nga afër ecurinë e punimeve për ndërtimin e pritës mbi lumin Shkumbin.
Nga komunikimi me banorë të zonës mësuam se punimet kanë nisur në 1 qershor, ndryshe nga çfarë deklaroi në muajin shkurt të këtij viti kryetarja e bashkisë së Lushnjes.
Foto nga punimet në terren
“Në datë 1 qershor vazhduan me punimet dhe para 2-3 ditësh kanë sjell materiale të nevojshme për të punuar”-shprehet Islami banor i kësaj zone
.
Foto nga punimet në terren
Tabela e punimeve e vendosur nuk tregon se kur ka nisur ndërtimi pritës, teksa specifikohet se punimet do të zgjasin për një periudhë 3 mujore.
Bashkia Lushnje: Shtyrje e punimeve për shkak të sasi së madhe të ujit
Lidhur me këtë çështje Faktoje pyeti zytarisht dhe bashki e Lushnje për të mësuar më shumë në lidhje me ecurinë e punimeve.
Kërkesa për informacion dërguar bashkisë Lushnje
Në përgjigjen e saj bashkia na bën me dije se punimet kanë filluar me vonesë për shkak të mbingarkesës së lumit me ujë dhe ato kanë nisur konkretisht në datë 1 qershor 2022. Pra 4 muaj pas dhënies së premtimit, kur ndërtimi i pritës duhet të kishte përfunduar tashmë.
Vlera e investimit sipas këtij institucioni është 13,520,828 lekë.
Screenshot nga përgjigja e Bashkisë Lushnje
Nisur nga verifikimi në terren dhe përgjigja e bashkisë Lushnje, premtimin e kreut të bashkisë Lushnje për punimet e pritës në lumin Shkumbin brenda afatave të dhëna në fushatë do ta kategorizojmë të pambajtur.
“Faktoje”, e mbështetur nga National Endowment Democracy (NED) po monitoron 10 bashki në vend dhe po verifikon nëse janë mbajtur ose jo premtimet e dhëna nga kryebashkiakët.
