Pretendimi: Personi që dogji Kuranin publikisht është ndëshkuar duke iu djegur duart
Verdikti: E pavërtetë
Në postime në rrjetet sociale në vendin tonë janë publikuar fotot e një burri me gishta të djegur dhe pretendohet se ai është ndëshkuar nga Zoti, pasi grisi dhe dogji Kuranin.
Postimet e shpërndara në rrjetet sociale
Ne bëmë një kërkim mbi personin e përmendur dhe foton e publikuar. Fillimisht, nëpërmjet “Google Image” konstatuam se imazhi i përket vitit 2012 dhë bëhet fjalë për një pacient në një spital në Oregon të SHBA, i cili u prek nga murtaja, pasi tentoi të nxirrte një mi nga goja e maces së tij.
Asokohe, “The Guardian” raportonte se “Paul Gaylord nuk është më në gjendje kritike, por ka frikë për gishtat e duarve dhe këmbëve, pasi ka marrë murtajë nga macja”. Sipas raportimit, sëmundja është shkaktuar nga bakteri “yersinia pestis”.
Në një intervistë realizuar nga “The Guardian” më 31 janar 2014, Gaylord tregonte se ai u prek nga murtaja, pasi u kafshua nga macja e tij Charlie. Pas kësaj, ai tha: “Kam qenë në koma për 27 ditë, gjatë së cilës duart dhe këmbët e mia u frynë dhe filluan të nxihen”.
Në një verifikim të kryer nga kolegët e AFP konfirmohet gjithashtu se personi në foto nuk ka asnjë lidhje me ndonjë episod të djegies së librit të shenjtë, Kuranit.
Në faqen e internetit të Qendrës Amerikane për Kontrollin dhe Parandalimin e Sëmundjeve thuhet: “Murtaja është një sëmundje që prek njerëzit dhe gjitarët e tjerë. Shkaktohet nga bakteri Yersinia pestis. Njerëzit zakonisht preken nga murtaja pasi kafshohen nga një plesht brejtësish që mban bakterin e murtajës ose duke trajtuar një kafshë të infektuar me murtajë”.
Pra, imazhe të vjetra të një pacienti të prekur nga murtaja po shpërndahen online, duke dezinformuar se ai është njeriu që dogji Kuranin.
