Video e një panelisti të Forumit Ekonomik Botëror, i cili pretendohet se ofendon themeluesin e organizmit global, po bën xhiron e rrjeteve sociale. Faktoje verifikoi se video është e rremë dhe se është thjesht një shaka e bërë nga një influencer.
Përdorues në rrjetet sociale kanë publikuar një video që në dukje tregon të jetë nga punimet e Forumit Ekonomik Botëror (WEF) që po zhvillohet këto ditë në Davos të Zvicrës dhe ku dëgjohet një nga panelistët që ofendon në transmetim live organizatorët.
Postime të ndryshme që shoqërojnë videon përgëzojnë autorin e saj, që dikush e cilëson si “gazetar investigativ polarizues”, për kurajon dhe përballjen e guximshme me organizatorët e forumit.
Postimet e shpërndara në rrjetet sociale
Videoja paraqet një burrë që supozohet se flet në konferencën vjetore të WEF në Davos, Zvicër. Pasi falënderon organizatorët që i dhanë mundësinë për të qenë aty si folës, sjellja e burrit ndryshon papritur. Ai dëgjohet duke fyer themeluesin e Forumit, Klaus Schwab dhe rendin e e ri botëror të krijuar nga ai dhe ato që cilësohen “elitat globale”. Më pas Schwab shihet që del nga skena përpara një publiku që e sheh i pezmatuar.
Ajo që nuk është kuptuar nga përdoruesit që kanë ndarë video është fakti se ajo është jo reale, e postuar nga një person që e quan vetën satirist, Damon Imani. Ai e etiketon qartë videon e WEF si satirë në postimin e tij në rrjetin X.
Video u postua edhe nga senatorë dhe zyrtarë të tjerë, të cilët më pas e ndryshuan dhe kërkuan falje, duke theksuar se video ishte një shaka.
Konferenca vjetore e WEF në Davos është bërë një objektiv i teorive konspirative dhe keqinformimeve rreth synimeve të udhëheqësve politikë dhe të biznesit, të cilët fajësohen si shkaktarë të zhvillimeve të debatueshme ekonomike dhe sociale.
Video është verifikuar edhe nga kolegët e mediave të huaja, të cilët treguan se pamjet nuk janë të vërteta, por një shaka e Damon Imani.
