Me nisjen e fushatës për zgjedhjet vendore të 14 majit, kandidatët po shpallin premtimet dhe arritjet, duke kërkuar të bindin komunitetin që t’u japë votën. E tillë është deklarata e kryetarit të Bashkisë së Vorës, Blerim Shera, gjatë takimit elektoral ku u prezantuan kandidatët e PS-së për Këshillin Bashkiak. Gjatë takimit ai theksoi se gjatë mandatit përfundoi ndërtimin e dy shkollave 9-vjeçare në Vorë dhe Bërxullë. Por këto vepra publike nuk janë ndërtuar nga Bashkia e Vorës, por me financim nga Bashkimi Europian.
Kryebashkiaku i Vorës, Blerim Shera dhe drejtuesi politik i qarkut të Tiranës, Erion Veliaj prezantuan më 3 prill kandidatët e Partisë Socialiste për Këshillin Bashkiak në këtë zonë. Gjatë fjalës së mbajtur, zoti Shera renditi një sërë punësh të kryera sipas tij në Bashkinë e Vorës duke bërë edhe disa premtime për mandatin e ardhshëm. Kryebashkiaku i Vorës dhe drejtuesi politik i qarkut Tiranë folën me “krenari” edhe për shkollat e ndërtuara aty.
“Shkollat janë imazhi i ri i qytetit. Përfunduam rindërtimin e shkollës 9-vjeçare Vorë. Përfunduam rindërtimin e shkollës 9-vjeçare Bërxullë”, deklaroi zoti Shera.
Por, kush i ka ndërtuar dy shkollat 9-vjeçare në Vorë dhe në Bërxullë? Në muajin tetor të vitit që lamë pas, Faktoje raportoi se kishin përfunduar punimet për ndërtimin e këtyre shkollave dhe ato ishin hapur për të pritur nxënësit.
Nga verifikimi i bërë në faqen zyrtare të EU4schools rezulton se shkolla 9-vjeçare Vorë nuk është ndërtuar me financim nga Bashkia e Vorës dhe as nga qeveria, por nga Bashkimi Europian nëpërmjet projektit për financimin e shkollave ‘EU4schools’. Objekti është hapur në tetor 2022 dhe ka një kapacitet prej 781 nxënësish.
Shkolla 9-vjeçare Vorë
Gjithashtu, edhe shkolla 9-vjeçare Bërxullë është një financim i Bashkimit Europian, ndonëse kryebashkiaku i Vorës e “shet” në prag të zgjedhjeve si një arritje e institucionit që ai drejton.
Shkolla 9-vjeçare Bërxullë është hapur që në fillim të vitit shkollor 2022-2023 dhe ka një kapacitet prej 361 nxënësish.
Të dhënat e EU4schools për shkollat
Shkolla 9-vjeçare Bërxullë
Edhe në përgjigjen zyrtare për Faktoje që mban datën 12 tetor 2022, Bashkia e Vorës pranon që këto dy institucione arsimore janë ndërtuar nga donatorë të huaj.
“Shkolla 9-vjeçare Vorë, e sapo rindërtuar nga donatorë ka nisur procesin mësimor. Shkolla me një kapacitet prej njëzet e tetë klasash, ka dy laboratorë dhe një palestër si dhe frekuentohet nga 701 (shtatëqind e një) nxënës.
Shkolla 9-vjeçare Bërxullë, e saporindërtuar nga donatorë ka nisur procesin mësimor. Shkolla ka një kapacitet prej tetëmbëdhjetë klasash, tre laboratorë dhe një palestër si dhe frekuentohet nga 303 (treqind e tre) nxënës”, thekson zyrtarisht Bashkia e Vorës.
Nisur nga ky verifikim i thjeshtë deklarata e krybashkiakut të Vorës se ka ndërtuar dy shkollat 9 vjeçare, rezulton e Pavërtetë dhe dizinformuese, duke e përdorur si propagandë elektorale.
Ky shkrim u publikua në kuadër të projektit “Nxitja e llogaridhënies së zyrtarëve të lartë” mbështetur nga National Endowment Democracy (NED) dhe zbatuar nga Faktoje.
