Trajtimi i mykut është një ndër këshillat e radhës që ofrohet nga portalet, duke përdorur intervista me mjekë të rremë. “Faktoje” sjell një sërë elementësh, të cilët tregojnë qartë se kemi të bëjmë me një artikull të pavërtetë.
Marketingu online i trajtimeve mjekësore pa recetë ofrohet shpesh në formën e këshillave nga mjekë apo pacientë që kanë provuar shërimin. I tillë është dhe reklamimi në portale i trajtimit për mykun e thonjve, i cili nuk heziton të ofrojë edhe disa shifra të frikshme për sa i përket humbjeve të jetës për shkak të këtij problemi.
“Kërpudhat e thonjve çojnë në mënyrë të pashmangshme në kancerin e gjakut dhe dëmtimin e organeve të brendshme. 78% e pacientëve me onikomikozë vdesin në moshën 40 deri në 50 vjeç”, shkruan portali “plantmedicile.online”.
Screenshot, artikulli i publikuar nga portali
Për të promovuar produktin e quajtur “Fungostop”, portali ka përdorur një intervistë me një mjeke, së cilës i jep vetëm emrin. Mjekja sipas portalit quhet thjesht Klea, duke mos i dhënë identitetin e saj të plotë. Kjo tregon qartë që kemi të bëjmë me një intervistë të sajuar nga ky portal.
Ne bëmë një verifikim të fotos, ku rezulton se imazhi i përdorur për të ilustruar mjeken i përket një biokimiste nga Hungaria, e cila quhet Katalin Karikó.
Gjithashtu, ajo që vihet re është se kjo media online ka përdorur logon e një televizioni kombëtar, me qëllim që të manipulojë audiencën, duke e prezantuar veten si një faqe e besueshme.
Një tjetër element që vihet re në tekst janë shifrat e përdorura. Portali shkruan ndër të tjera: “A jeni në dijeni sa njerëz vdiqën nga Mikoza në vitin 2021? Vitin e kaluar, 55,000 njerëz vdiqën në Shqipëri. Nga këta, 31,000 njerëz vdiqën nga myku i thonjve që përbën më shumë se gjysmën e numrit të përgjithshëm”. Por, duke iu referuar të dhënave zyrtare nga Instituti i Statistikave rezulton se gjatë vitit 2021 në vendin tonë kanë humbur jetën në total 30 mijë persona dhe jo 55 mijë siç përpiqet të manipulojë lexuesit portali nëpërmjet artikullit. Siç shihet edhe nga tabela, numri më i madh i humbjeve të jetës janë si pasojë e sëmundjeve të aparatit të qarkullimit të gjakut dhe jo nga myku i thonjve.
Screenshot, të dhënat nga INSTAT
Përdorimi i mediave online për të shitur produkte të caktuara për shëndetin është kthyer në një shqetësim serioz dhe kjo është denoncuar në disa artikuj nga Faktoje.
*Lajmi publikohet në kuadër të bashkëpunimit mes Faktoje dhe Facebook për të luftuar dizinformimin
