Pretendimi: Pep Guardiola refuzon të shtrëngojë duart me një lider izraelit në stadium
Verdikti: I pavërtetë
Në mediat sociale është publikuar një video e menaxherit të klubit të futbollit Manchester City, Pep Guardiola, i cili shfaqet në stadium duke shtrënguar duart pas një ndeshjeje, por injoron një prej tyre.
Krahas pamjeve pretendohet se personi në fjalë, që u injorua nga Guardiola, është një përfaqësues izraelit.
“Pep Guardiola refuzon të shtrëngojë duart me një lider izraelit që ishte prezent sot në ‘Uembli Stadium’ në finalen e FA Kupës midis Mançester Sitit dhe Mançester Junajtedit! Respekte për një nga trajnerët më të mirë që njeh historia e futbollit”- shkruhet në postimin e portalit sportiv infosport.mk, që shoqëron videon e ceremonisë në Uembli.
Postimet e shpërndara në rrjetet sociale
Ne bëmë një kërkim në lidhje me keto pretendime që qarkullojnë online. Në një verifikim të bërë nga kolegët e “Reuters” theksohet se në fakt personi në video që nuk takoi Guardiola pas ndeshjes së gushtit të vitit 2023, ishte ish-menaxheri anglez i futbollit Alan Smith, jo një përfaqësues izraelit. Kjo është konfirmuar edhe nga vetë Smith në një reagim për Reuters.
Smith tha se ai nuk ka qenë kurrë një përfaqësues i Izraelit dhe se mori pjesë në ndeshjen, e cila u zhvillua në stadiumin “Wembley” të Londrës më 6 gusht 2023, si i ftuar i Federatës së Futbollit.
Ish-trajneri i “Crystal Palace” shtoi se shpërqwndrimi i Guardiolës mund të ketë qenë një arsye pse ata nuk shtrënguan duart. Smith tha se ai mban një marrëdhënie të mirë me zyrtarët e Manchester City.
Incidenti, për të cilin Guardiola nuk ka komentuar kurrë publikisht, u raportua gjerësisht nga mediat e huaja asokohe. Veç kësaj, video e incidentit është regjistruar para sulmit të 7 tetorit të vitit 2023.
