Frymëzuar nga postimi në Facebook i kryeministrit Edi Rama, një numër mediash kanë raportuar se marka e famshme Louis Vuitton kishte hedhur së fundmi në treg një çantë me motive të flamurit shqiptar. Verifikimi i “Faktoje” zbuloi se çanta në fjalë është prezantuar që në 2018, me rastin e botërorit, por jo nga shtëpia e njohur e modës, por nga një markë tjetër që ka ripërdorur çanta klasike LV.
————————————————
Një postim në faqen e Facebook të kryeministrit Rama, që pretendon se një çantë me motive të flamurit shqiptar është “çanta e re e shtëpisë së madhe të modës Louis Vuitton”, ka frymëzuar një sërë artikujsh në disa media që përsërisin pretendimin e Ramës si fakt.
Postimi i kryeministrit Edi Rama
Megjithatë, një kërkim pak më i thelluar mbi këtë dizajn, zbulon se ai ekziston prej së paku 4 vitesh.
Në fakt, ajo ishte pjesë e një koleksioni të limituar të vitit 2018 nga marka JAY AHR e stilistit Jonathan Riss, që përfshin thuajse 130 flamuj nga gjithë bota. Çantat e këtij koleksioni janë çanta vintazh Louis Vuitton, të ripërdorura nga Jay Ahr. Siç e përshkruan stilisti Riss, çanta blihet, çmontohet, trajtohet dhe riparohet, dhe secila pjesë i dërgohet qëndistarëve të ndryshëm. Pas qëndisjes, çanta qepet sërish në formën origjinale me peun origjinal. Ky proces ndoshta justifikon dhe çmimin prej afër $10,000.
Kështu, çanta në fjalë nuk është e re, ajo ka ekzistuar që në vitin 2018. Për më tepër, ajo nuk është hedhur në treg dhe nuk mban autorësinë e shtëpisë së modës Louis Vuitton, por është një ripunim i firmës JAY AHR mbi një çantë klasike LV.
“Faktoje” iu drejtua edhe markës së famshme Louis Vuitton, dhe është në pritje të një përgjigjeje zyrtare.
