Së fundmi një lajm se shteti iranian do të ekzekutojë 15 mijë persona ka qarkulluar edhe në mediat shqipfolëse. Verifikimi i “Faktoje” zbuloi se kjo shifër është e ekzagjeruar. Në të vërtetë, parlamenti iranian ka kërkuar dënim të rreptë për protestuesit dhe disa janë dënuar me vdekje, por jo 15 mijë prej tyre. 

————————————————-

Në vazhdën e protestave masive në Iran, shkaktuar nga vdekja e Mahsa Aminit më 16 shtator, disa media, duke përfshirë dhe ato shqipfolëse, raportuan në mes të Nëntorit se shteti islamik u ishte përgjigjur kësaj lëvizjeje duke dënuar 15 mijë protestues me vdekje. Lajmi u shpërnda edhe nga kryeministri kanadez Justin Trudeau në Twitter.

Megjithëse një reagim i tillë mund të duket jo i pazakontë nga një regjim totalitar si ai i Iranit, pretendimi se 15 mijë protestues janë dënuar me vdekje rezulton të jetë i pavërtetë.

Ky pretendim i rremë duket se është formuar nga disa të vërteta që janë ngatërruar me njëra- tjetrën duke kaluar nga një media në tjetrën, nga një rrjet social në tjetrin. 

Organizata e bazuar në ShBA “Human Rights Activists News Agency” raportoi më 15 nëntor se mbi 15 mijë persona ishin arrestuar gjatë protestave në Iran. Ndërkohë një përfaqësues i OKB në Iran tha për CNN se 14 mijë persona ishin arrestuar.

Media shtetërore iraniane IRNA raportoi se shumica e parlamentit iranian kishin firmosur një letër të hapur që i kërkonte gjyqësorit ndëshkim të shpejtë dhe të rreptë për protestuesit e arrestuar. Kjo letër, megjithatë, nuk specifikonte ndëshkimin me vdekje. OKB dënoi letrën e parlamentit si “shkelje flagrante e ndarjes së pushteteve.”

Siç evidentohet dhe nga letra e parlamentit, nuk është ky i fundit që vendos për ndëshkimin, por sistemi gjyqësor i Iranit. Ky gjyqësor ka dënuar me vdekje katër protestues deri në shkrimin e këtij artikulli. Këto dënime janë paraprake dhe mund të apelohen.

Megjithatë, kjo nuk do të thotë se dënimet me vdekje në Iran janë të shpërfillshme. Sipas Amnesty International, në gjysmën e parë të 2022 Irani ekzekutoi të paktën 251 persona. Shteti totalitar islamik mban vendin e parë për numrin e ekzekutimeve për banor.