Një imazh që qarkullon në internet pretendon se Papa Francesku ka thënë se pedofilët do të kenë një vend të veçantë në parajsë. Verifikimi i “Faktoje” tregoi se imazhi është i stisur dhe Papa Francesku nuk e ka bërë këtë deklaratë kontroverse.
————————–
Në rrjetet sociale shqipfolëse po shpërndahet një imazh që duket se tregon një screenshot nga llogaria në Twitter e kreut të kishës katolike, Papa Franceskut, ku shkruhet: “Zoti i mirëpret pedofilët në mbretërinë e tij të parajsës.” Imazhi shoqërohet me përshkrimin: “Papa Françesku deklaron se pedofilët kanë një vend të veçantë në qiell.”
Skeptikë se Papa Francesku do të jepte publikisht një deklaratë kaq kontroverse, “Faktoje” vendosi të gjejë burimin e këtij imazhi, i cili, çuditërisht, nuk përmban datën se kur supozohet se është bërë ky postim.
Duket se ky pretendim e ka origjinën në një artikull të 20 shkurtit 2023 në gazetën online NewsPunch. Ky artikull nuk jep linkun e postimit të pretenduar në Twitter. Në vend të tij, artikulli përsërit një numër teorish konspirative ku Papa Francesku supozohet se është i përfshirë, madje pretendon edhe se Papa ka thënë se “Jezus Krishti është Satanai”.
Duke qenë se as artikulli i NewsPunch nuk jep një burim për postimin e Papës, “Faktoje” vendosi të bënte një kërkim në Twitter. Kërkimi për fjalinë “Zoti i mirëpret pedofilët në mbretërinë e tij të parajsës” në llogarinë zyrtare të Papës (@Pontifex) nuk nxjerr asnjë rezultat. Ky postim nuk ekziston në llogarinë e Twitter të Papës.
Për të treguar se sa e thjeshtë është të bësh të duket sikur dikush ka postuar një deklaratë në Twitter, “Faktoje” krijoi disa postime të rreme nga llogaria e Papë Franceskut.
Se sa lehtë dhe shpejt mund të bëhet kjo, tregohet në videon më poshtë:
