Pretendimi: Kjo video e gotës së ujit që qëndron mbi tryezë në 0 gravitet dëshmon mashtrimet e NASA
Verdikti: Video e modifikuar
————-————————————————
Video e një burri duke vendosur gotën e ujit mbi tryezë në çfarë duket si një hapësirë pa gravitet po shpërndahet në rrjete sociale si dëshmi se agjencia hapësinore amerikane NASA ka mashtruar për fluturimin hapësinor.
Me anë të motorit të kërkimit pamor Google Lens, Faktoje gjeti videon origjinale, e cila është botuar në kanalin zyrtar të NASA në Youtube më 26 shtator 2019.
Video tregon nëntë astronautë në Stacionin Ndërkombëtar Hapësinor (ISS), hera e parë që nga viti 2015 që kaq shumë persona popullonin stacionin hapësinor. Në fund të një udhëtimi prej më shumë se gjashtë orësh që filloi nga baza hapësinore “Baikonur Cosmodrome” në Kazakistan më 25 shtator 2019, astronautja e NASA Jessica Meir dhe Oleg Skripochka, nga Roscosmos ruse mbërritën në ISS dhe ekuipazhi u lidh në transmetim me Tokën për të festuar ardhjen e kolegëve.
Në videon origjinale, burri që vendos gotën e ujit në tryezë nuk figuron.
Burri, i cili shfaqet në cepin e poshtëm, djathtas, në klipin që qarkullon në rrjete sociale, nuk ekziston në videon origjinale
Klipi që qarkullon në rrjete sociale, dukshëm është manipuluar, duke i mbivendosur burrin me gotë uji videos origjinale të astronautëve në stacionin hapësinor.
