Pretendimi: Skocezët mund të përballen me burg për mbajtjen e pulave të paregjistruara
Verdikti: Gjysmë i vërtetë
Vjolanda Peca
Një politikë e re skoceze rreth mbajtjes së pulave është përfshirë në debatin ndërkombëtar rreth lirisë personale dhe ndërhyrjes së qeverisë. Imazhi i krijuar nga AI që tregon një burrë të rrethuar nga pula duke u arrestuar nga policia e veshur me armaturë trupore, u shpërnda gjerësisht nga disa llogari të njohura në X.
Teksti i imazhit pretendonte se zotërimi i një pule të paregjistruar mund të çojë në burgim.
“6 muaj burg ose £5,000 gjobë nëse nuk regjistroni mbajtjen e 1 pule në Skoci duke filluar nga 1 shtatori 2024 është për të mirën tuaj!!!
Imazhi filloi të shpërndahet gjerësisht në internet, pasi u raportua në media se Skocia kishte zbatuar një regjistrim për pulat, mes shpërthimeve të gripit të shpendëve, i njohur si gripi i shpendëve.
Ai u bë viral në rrjetet sociale pasi u shpërnda nga llogari të njohura në X, por edhe në faqe shqiptare.
Llogaritë që e kanë shpërndarë apo të anketuarit skocezë kanë shprehur haptazi mospajtimin me politikat që qeveria skoceze ka marrë duke treguar që ky është një shembull i “tiranisë” së qeverisë.
Foto të tilla të gjeneruara me AI dhe të shpërndara masivisht kanë bërë të mundur që anti-qeveritarët të bëhen palë me teoritë konspirative apo të paverifikura me qëllim shumimin e mbeshtetësve.
Është e saktë të thuhet se të gjitha pulat në Skoci do të kërkohet të deklarohen në një Regjistër të Ri të Shpendëve. Më parë, tufat me më shumë se 50 zogj duhej të regjistroheshin.
Rregullat e reja përfshijnë zogjtë e mbajtur në zonat e banuara dhe tufat më të mëdha komerciale, përfshirë pulat, zogjtë grabitqarë dhe pëllumbat. Shumica e zogjve të kafazuar të mbajtur brenda shtëpisë, si papagajtë apo kanarinat nuk kërkohet të regjistrohen.
Regjistri hapet më 1 shtator 2024 në Skoci. Të njëjtat rregulla janë në fuqi në Irlandën e Veriut dhe do të zbatohen gjithashtu në Angli dhe Uells, ku do të ketë një afat deri më 1 tetor.
Qeveritë skoceze dhe britanike thanë në një konsultim se kjo po zbatohej si një mbrojtje kundër shpërthimeve të gripit të shpendëve në të gjithë Mbretërinë e Bashkuar, si dhe për t’u përputhur me rregullat e tregtisë së Bashkimit Evropian.
Qeveria Skoceze konfirmoi për Shërbimin e Fakteve Ferret se shkeljet do të bëhen sipas seksionit 73 të Aktit të Shëndetit të Kafshëve 1981. Këto rregulla parashikojnë një gjobë prej £5,000 dhe një dënim maksimal prej gjashtë muajsh burg për shkelësit.
Zbatimi kryesisht do të bëhet përmes paralajmërimeve verbale ose të shkruara, me ndjekjen penale që konsiderohet si zgjidhja e fundit për të ndëshkuar ata që refuzojnë të regjistrojnë shpendët.
Një pretendim i promovuar gjerësisht është se” Forumi Ekonomik Botëror” po përpiqet të kontrollojë furnizimin me ushqim si një mënyrë për të ndikuar në popullatat në mbarë botën.
E nga ana tjetër shumë nga ata që e shpërndanë imazhin AI në internet lidhur me pulat, bënë pretendime të ngjashme duke e lidhur atë me WEF dhe përpjekjet e supozuara për të kontrolluar furnizimin me ushqim.
Është e vërtetë që Skocia do të kërkojë që kushdo që mban pula jashtë t’i regjistrojë ato në një bazë të dhënash. Qeveria Skoceze ka deklaruar se kjo ka për qëllim të reduktojë shpërthimet e gripit të shpendëve. Ndërsa dënimet maksimale për mos përmbushje përfshijnë burg ose £5,000 sipas legjislacionit ekzistues, vetë qeveria skoceze konfirmon se këto dënime nuk do të përdoren në çdo rast.
