Pretendimi: Garda Kombëtare refuzoi të nderonte Joe Biden gjatë betimit të tij në 2021
Verdikti: E pavërtetë
Me afrimin e ceremonisë së betimit të presidentit të zgjedhur Donald Trump, në rrjete sociale në vendin tonë është rifshfaqur një video ku pretendohet se ushtarët e Gardës Kombëtare nuk nderuan Joe Biden gjatë betimit më 20 janar të vitit 2021. Si provë për këtë sillen disa sekuenca nga një filmim i trupave të Gardës Kombëtare katër vite më parë.
“…Asnjë anëtar i Gardës Kombëtare nuk e përshëndeti paradën presidenciale të Joe Biden… Me të drejtë…”- shkruhet në postimin që shoqëron videon në profilin “Patriotët e botës së re” në Facebook.
Postimet e shpërndara në rrjetet sociale
Në videon e xhiruar nga një automjet në lëvizje duken ushtarët e Gardës Kombëtare të kthyer me kurriz nga rruga ku po kalojnë mjetet ku ndodhet kamera. Përdoruesit pretendojnë se Garda Kombëtare i ka “kthyer shpinën” Biden, si një shenjë për të treguar pakënaqësinë e tyre ndaj Biden.
Ne bëmë një kërkim të këtyre pamjeve, duke përdorur mjetet e verifikimit të imazheve ku rezulton se video është publikuar në janar të vitit 2021, në ditën e inaugurimit të Biden si president, nga reporterja e ABC, Ines de La Cuetara, e cila shkruante: “Pamja nga autokolona e Bidenit teksa shkonte në Kapitol”.
Pamjet i përkasin momentit kur autokolona po largohej nga Varrezat e Arlingtonit dhe drejtohet në rrugën 15-të ku presidenti Biden filloi të ecte drejt ceremonisë.
Ndryshe nga çfarë aludohet, në pamjet e mëtejshme të ceremonisë duke iu afruar Kapitolit, autokolona nderohet nga ushtarakët e vendosur në të dyja krahët e rrugës. Edhe një video e publikuar në janar të vitit 2017 gjatë inaugurimit të Donald Trump, tregon të njëjtin pozicionim të ushtarëve. Edhe gjatë inaugurimit të ish-presidentit Barack Obama shihen ushtarët në të njëjtin qëndrim.
Zyrtarë të medias në Gardën Kombëtare gjithashtu konfirmuan për kolegët e Reuters, që verifikuan këtë pretendim, se video tregon protokollin rutinë për këtë detyrë. Pozicionimi i ushtarëve të Gardës Kombëtare është pjesë e detyrave për të kontrolluar perimetrin e sigurisë dhe ata nuk ishin pjesë e ceremonialit të betimit të presidentit.
Më shumë se 26,000 trupa të Gardës Kombëtare u mobilizuan asokohe për të mbrojtur ndërtesën e Kongresit gjatë ceremonisë së betimit të presidentit Biden, si një masë e mundshme sigurie pas sulmit të dhunshëm të 6 janarit nga mbështetësit republikanë.
