Foto e përdorur nga portalet për të ilustruar ngjarjen e ndodhur në Lushnjë, ku një fëmijë rrezikoi të binte nga dritarja e katit të pestë të pallatit, në fakt i përket një incidenti në Turqi. Imazhi u përdor nga mediat online në Shqipëri si “karrem” për të tërhequr klikime.
Më 24 korrik, portalet kanë publikuar një lajm mbi shpëtimin e një fëmije në Lushnjë, i cili rrezikonte të binte nga kati i 5-të i një pallati. Në artikull, mediat i janë referuar një njoftimi të policisë së Shtetit. Mirëpo, ajo që tërheq vëmendjen është foto e publikuar krahas artikullit.
“Shmanget tragjedia në Lushnjë, fëmija rrezikoi të binte nga kati i pestë i pallatit!”-shkruan portali “Fieri Sot”.
Postimi i portalit “Fier Sot”
I njëjti artikulli, me të të njëjtën foto është publikuar edhe nga portali “Fax web”.
Postimi i portalit “Fax Web”
Ne bëmë një verifikim të lajmit të publikuar nga portalet, fillimisht duke iu referuar informacioneve zyrtare nga Policia e Shtetit.
Në komunikimin zyrtar policia njofton: “Rreth orës 13:00, në sallën operative, ka telefonuar një qytetar për të kërkuar ndihmë, pasi në lagjen ‘Skënder Libohova’, Lushnjë, një fëmijë po rrezikonte të binte nga dritarja e katit të pestë të pallatit.
Falë ndërhyrjes së menjëhershme të shërbimeve të Policisë është shpëtuar fëmija 5 vjeç që kishte kishte hipur dhe kishte ngecur në parvazin e dritares, në një moment që familjarët nuk kishin qenë ne atë dhomë”.
Pra, ashtu siç raportojnë portalet, kemi të bëjmë me një lajm të vërtetë, por foto e përdorur nga mediat online nuk përkon me ngjarjen e ndodhur në Lushnjë.
Njoftimi i shpërndarë nga policia
Nëpërmjet mjeteve të verifikimit të fotove, konstatuam se imazhi i përdorur i përket një ngjarje të ndodhur në shtator të vitit 2021 në Stamboll.
“Në Stamboll Başakşehir, një fëmijë doli nga dritarja e hapur e shtëpisë dhe u ul në parvaz për minuta të tëra”, raportonin asokohe mediat turke. Imazhi i një fëmije të mitur që ecën këmba-dorazi në parvazin e një dritareje është shokues për cilindo që e shikon qoftë edhe për një moment të vetëm.
Falë kësaj fotoje ilustruese portalet kanë tërhequr më shumë lexues. Nëpërmjet fotove dhe lajmeve të tilla, portalet përfitojnë nga interesi i qytetarëve për tema të ndjeshme për të marrë sa më shumë klikime.
