Fotot e shpërndara në rrjetet sociale, të cilat pretendohet se i përkasin sulmeve të Palestinës ndaj tankeve izraelite nuk kanë lidhje me këto zhvillime. Faktoje verifikoi se imazhet i përkasin konflikteve të tjera të ndodhura më parë.
Postime të shpërndara në rrjetet sociale në vendin tonë pretendojnë se forcat palestineze kanë shkatërruar tanket izraelite. Ky postim është shoqëruar me foto, të cilat supozohet se i përkasin këtij sulmi.
“Tanket e jehudëve të shkatërruara nga rezistenca palestineze”-shkruajnë përdorues në rrjetet sociale.
Postimi i shpërndarë në rrjetet sociale
Në lidhje me këto pretendime, ne vendosëm të bëjmë një verifikim. Fillimisht kërkuam në Google nëse kishte pasur një sulm kaq agresiv nga ana e organizatës Hamas ndaj tankeve izraelitëve.
Nga kërkimi rezulton se 2 tanke izraelite dhe 4 automjete janë shkatërruara në veri të Gazës më datë 1 nëntor.
“Dy tanke izraelite dhe katër automjete ushtarake izraelite u shkatërruan me predha kundër blindave në qytetin Beit Hanoun në Rripin verior të Gazës, tha Hamasi të mërkurën. Krahu i armatosur i grupit, Brigadat Qassam, tha në një deklaratë se dy tanket u goditën nga predha ‘Yasin 105″-raportojnë mediat e huaja.
Mirëpo, ne bëmë edhe një verifikim të fotove të përdorura nga përdoruesit në rrjetet sociale. Nëpërmjet mjeteve të verifikimit të fotove rezulton se imazhi i parë i përket zhvillimeve nga lufta në Ukrainë.
Ndërkohë, imazhi tjetër qarkullon në rrjet që prej vitit 2017 dhe nuk ka lidhje me luftën mes Izraelit dhe Palestinës. Pra, ka pasur një sulm nga palestinezët ndaj tankeve të Izraelit, por imazhet e përdorura nuk kanë asnjë lidhje me këtë ngjarje.
Faktoje ka verifikuar një sërë informacionesh të rreme që lidhen me luftën mes Izraelit dhe Hamasit.
