Pretendimi: Kjo është një foto e mbretëresha britanike Kamila me këmishe nate dhe alkool
Verdikti: E pavërtetë
Foto e Mbretëreshës britanike Kamila, ku shfaqet me këmishë nate dhe alkool është thjesht një krijim artistik, ndryshe nga çfarë pretendohet në rrjetet sociale.
Një foto e shpërndarë në rrjetet sociale në vendin tonë tregon një pamje jo shumë noramle për publikun të mbretëreshës britanike Kamila, veshur me një këmishë nate, teksa konsumon alkool në fronin mbretëror. Në tekstin që shoqëron imazhin aludohet se Kamila shijonte çastet e vetme, teksa Mbretit Charles festonte ditëlindjen.
“Sot është festa e ditëlindjes së Mbretit të Britanisë! Por lind pyetja: Ku është Mbretëresha e re Kamila?!”-shkruajnë një përdorues krahas fotos.
Postimet e shpërndara në rrjetet sociale
Faktoje vendosi të bëjë një verifikim të imazhit. Nëpërmjet “Google Reverse Image” gjetëm se kjo foto në fakt është një krijim artistik dhe se Mbretëreshë Kamila nuk është shfaqur kurrë në një foto publike me këmishë nate duke konsumuar alkool.
Artistja që prodhon imazhe të tilla quhet Alison Jackson dhe është mjaft e njohur për këto krijime të saj. Alison Jackson ka krijuar shpesh herë zhurmë me krijimet e saj, të cilat në disa raste janë marrë të mirëqena. Një nga arritjet më emblematike janë fotografitë e famshme të Marilyn Monroe dhe John F. Kennedy, të diskutuara në ankande dhe të shpeshta në faqet e verifikimeve.
Familja mbretërore britanike, por edhe liderë botërorë kanë qenë pjesë e krijimeve të çuditshme të artistes britanike.
“Një këmbë në të vërtetën, një këmbë në fantazi, Alison Jackson eksploron se si fotografia, kulti i të famshmëve dhe media e kanë transformuar marrëdhënien tonë në atë që është “reale”-thuhet në faqen e saj në internet, ku janë të publikuara krijimet e artistes.
Foto e Mbretëreshës Kamila është thjesht një krijim artistik dhe aty nuk ka asgjë reale, ndryshe nga çfarë pretendohet në postime të shpërndara në rrjetet sociale.
