Një foto që tregon dy punonjëse policie duke luajtur në ambjentet e punës po qarkullon së fundi online duke grumbulluar mbi 10 mijë shikime. E shoqëruar me sloganin e famshëm të epokës së ministrit Tahiri, “policia që duam”, kjo foto ka siguruar qindra komente nga personazhe publikë dhe qytetarë të thjeshtë që shprehin indinjatën e tyre për situatën ku është ‘katandisur” uniforma e policisë. “Sa turp… Policia e Shtetit, “Oh Zot, Shtet patatinash”, “…kjo ndodh vetëm te populli jonë”, këto janë vetëm disa nga komentet që shoqërojnë foton.
Një shikim pak më i vëmendshëm i detajeve në foto konstaton se dicka nuk shkon me ngjyrën dhe simbolet e uniformës policore shqiptare të vajzave në foto.
Me anë të një kërkimi në motorin e kërkimit të imazheve TinEye, “Faktoje” zbuloi se foto origjinale i përket uniformës së policisë ruse. është lehtësisht e dallueshme që në imazhin origjinal mbishkrimin POLICIA si dhe logot e uniformës janë në alfabetin Cirilik, ashtu si dhe detaje të tjera në ambjentin e dhomës ku është shkrepur kjo foto nuk janë në gjuhën shqipe.
Ajo është një version i modifikuar për ta bërë të duket sikur personat kanë veshur uniformë policie shqiptare, siç tregohet më poshtë.
Foto origjinale (majtas) dhe foto e modifikuar (djathtas)
Krahasim i fotos së montuar me atë origjinale
Foto është postuar për herë të parë në vitin 2019 e shoqëruar me vendndodhjen e saj në një nga kazermat e policisë ruse. E manipuluar me photoshop, për të dhënë idenë se bëhet fjalë për policet shqiptare, foto qarkullon në hapësirat online shqipfolëse prej vitin 2020 duke grumbulluar mijëra shikime.
