Një analizë e “Financial Times” për agresionin në Ukrainë është nxjerrë nga konteksti nga portali Mast.al duke “konfirmuar fitoren e Rusisë” apo edhe vlerësime të larta nga kjo media prestigjioze për gjeneralin në krye të ushtrisë ruse.

Në 26 dhjetor, gazeta prestigjoze Financial Times ka publikuar një artikull me titull, “Lufta e madhe është rikthyer, pesë mësime nga pushtimi rus në Ukrainë”. Në shkrimin e tij gazetari John Paul Rathbone, ndër të tjera, citon ekspertë të sigurisë, ushtarakë apo këshilltarë, të cilët flasin mbi këto ‘pesë mësime’ nga agresioni rus në Ukrainë.

Artikulli i “Financial Times” është ripublikuar më 29 dhjetor në portalin Mast.al në rublikën info/opionine por ndryshe nga origjinali, përshtatja e tij në shqip është nxjerrë nga konteksti.

Financial Times: “Rusia po e Fiton Luftën në Ukrainë Duke Zbatuar Pesë Parime Themelore të Luftës!”– shkruan në titull portal Mast.al, ndërkohë që në asnjë radhë të shkrimit origjinal nuk thuhet se Rusia po e fiton luftën në Ukrainë dhe aq më pak në titullin origjinal.

Screenshot nga portali Mast.al

Thuajse në të gjithë artikullin portali Mast.al glorifikon figurën e Surovikin, gjeneralit rus që nga muaji tetor është vënë në krye të forcave ruse në Ukrainë.

Askush (as në Perëndim) nuk e ka përvojën luftarake të Surovikin. Të gjitha vendimet e tij tani zbatohen automatikisht, sepse ai i di rezultatet paraprakisht.”– shkruhet ndër të tjera në brendësi të artikullit.

Nga verifikimi i “Faktoje” i shkrimit origjinal rezulton se “Financial Times” e përmend vetëm në një paragraf gjeneralin rus. Për të sjellë më konkretisht tonin e artikullit mbi gjeneralin mund të shërbejë paragrafi i mëposhtëm:

“Putin në tetor emëroi gjeneralin Sergey Surovikin për të komanduar forcat ruse në Ukrainë. Surovikin, një veteran i luftës në Siri, është “ndoshta komandanti më kompetent që Rusia ka vendosur”, tha Dara Massicot, një eksperte ushtarake ruse në think-tank-in e korporatës Rand“.

Ka mjaftuar ky citim i ekspertës ushtarake ruse që portali Mast.al të shkruajë një opinion të gjatë mbi aftësitë dhe përvojën e gjeneralit rus, duke pretenduar në titull që Rusia falë tij po e fiton edhe këtë luftë. Ka shumë gjasa që në këtë formë të jetë transmetuar artikulli edhe për publikun e gjerë në Rusi, i cili merr informacione të përpunuara nga ekspertët e propagandës dhe censurës për zhvillimet e luftimeve në Ukrainë.

*Lajmi publikohet në kuadër të bashkëpunimit mes Faktoje dhe Facebook për të luftuar dizinformimin