Administratori i Korporatës Elektroenergjitike Shqiptare Ergys Verdho deklaroi në media se bursa hungareze e energjisë HUDEX ka shitur energji, mbi 1000 euro/Mwh në javën e parë të shtatorit. Faktoje bëri një verifikim dhe rezultoi se energjia u tregtua me këtë çmim në HUDEX për vetëm dy orë mbrëmjen e 30 gushtit. Çmimi real i energjisë në shtator është gati sa gjysma e vlerës së deklaruar nga zyrtari i KESH.

Esmeralda Topi

“Aktualisht HUDEX parashikon çmime në nivele 550-750 Eur/MWh për periudhën e mbetur të vitit 2022, ndërkohë që në javën e kaluar çmimet paraqiteshin me vlera deri në 1000 Euro/MWh, çka e bën edhe më të vështirë e të paparashikueshme të ardhmen e afërt”- deklaroi për Shqiptarja.com Administratori i Korporatës Elektroenergjitike Ergys Verdho më 13 shtator.

Faktoje bëri një verifikim mbi çmimet e energjisë në bursën e Hungarisë, që shërben si referencë për transaksionet në Shqipëri.

Referuar shifrave të publikuara në bursën HUDEX, rezulton se çmimi i energjisë nga data 1 shtator deri në 13 shtator është luhatur nga vlera 310 euro/MWh deri në 618 euro/MWh.

01.09.2022 618.10
02.09.2022 493.95
03.09.2022 358.01
04.09.2022 310.42
05.09.2022 449.36
06.09.2022 531.44
07.09.2022 484.01
08.09.2022 481.41
09.09.2022 384.77
10.09.2022 404.32
11.09.2022 391.64
12.09.2022 436.37
13.09.2022 448.65

Cmimi i energjisë në bursën HUDEX (30.08.2022)

Të dhënat ‘rrëzojnë’ deklaratën e Administratorit të KESH Ergys Verdho. Sipas kërkimeve që bëri Faktoje, çmimi i energjisë mbi 1000 Euro/MWh që i referohet administratori i KESH, i takon datës 30 gusht. Përkatësisht, në orën 20.00 dhe orën 21.00 të datës 30 gusht, çmimi i energjisë elektrike në bursën e Hungarisë arriti vlerën 1047.10 euro/MWh dhe 1040.76 euro/MWh.

30.08.2022 H1 617.49
30.08.2022 H2 595.07
30.08.2022 H3 585.01
30.08.2022 H4 584.96
30.08.2022 H5 596.98
30.08.2022 H6 612.55
30.08.2022 H7 762.64
30.08.2022 H8 778.06
30.08.2022 H9 791.31
30.08.2022 H10 765.75
30.08.2022 H11 751.11
30.08.2022 H12 751.14
30.08.2022 H13 768.08
30.08.2022 H14 767.59
30.08.2022 H15 752.72
30.08.2022 H16 776.29
30.08.2022 H17 804.26
30.08.2022 H18 812.22
30.08.2022 H19 914.13
30.08.2022 H20 1047.10
30.08.2022 H21 1040.76
30.08.2022 H22 887.08
30.08.2022 H23 633.04
30.08.2022 H24 580.01

Cmimi i energjisë në bursën HUDEX (30.08.2022)

“Duhet të jemi të vërtetë që ky çmim që i referohen ka qënë vetëm për dy orë në datën 30 gusht. Vendi ynë 70% të energjisë e prodhon vetë dhe 30 % e importon, i gjithë diskutimi për krizën bëhet për këtë 30%! Me pak fjalë, kriza më shumë është mediatike sesa reale! Ne jemi të rrezikuar nga kriza e energjisë elektrike vetëm në rastin kur do të mungojnë reshjet dhe do të ulet rezerva hidrike në 3 hidrocentralet kryesore të vendit tonë. Në rast se ne do të kemi vjeshtë me reshje normalisht që do e përballojmë vetë situatën energjitike pa “krizë”!”- thotë për Faktoje eksperti i energjisë Azmer Duleviç.

Për shkak të situatës së vështirë hidrike në kaskadën e Drinit, Shqipëria vijon të mbetet e ekspozuar ndaj çmimeve të larta në bursa. Që nga fillimi i këtij viti, vendi ynë ka blerë rreth 284 milionë euro energji elektrike. Fatura e blerjes së fundit nga Korporata Elektroenergjetike Shqiptare kap vlerën e 29 milionë eurove si blerje energjie për plotësimin e nevojave konsumatore për periudhën 12-18 shtator. Referuar të dhënave të publikuara nga KESH, në total janë blerë 58,660 MWh energji me një çmim mesatar të ponderuar 494.2 euro/MWh.

Screenshot me të dhëna nga rezultatet e tenderit për blerje energjie 12-18 shtator

Prej datës 11 shtator Korporata Elektronegjetike Energjetike shqiptare ka nisur të alternojë prodhimin dhe menaxhimin e kaskadës duke ndaluar prodhimin nga Fierza dhe duke lënë në punë vetëm Komanin dhe Vaun e Dejës. Prodhimi nga këto HEC-e sipas KESH do të krijojë hapësirën e nevojshme për prurjet që parashikohen nga reshjet në vijim.

“Muaji Shtator sipas parashikimeve pritet të jetë i freskët dhe i lagësht, ku priten evente me reshje shiu duke përmirësuar ndjeshëm situatën hidrike në kaskadë. Eventi me reshje shiu pritet në datat 16-17 Shtator.”- shkruhet në njoftimin e Korporatës Elektroenergjitike Shqiptare.