Pretendimi: Miliarderi Elon Musk dikur ndihmoi një kamariere të Starbucks t’i blejë vajzës së saj një dhuratë.
Verdikti: E pavërtetë
————————————————-
Një thashethem që qarkulloi në rrjet, përfshi dhe mediat shqipfolëse, në fillim të 2025 pretendonte se miliarderi Elon Musk ndihmoi një kamariere të Starbucks t’i blejë vajzës së saj një dhuratë.
Faktoje përdori motorin e kërkimit pamor Google Lens për të gjetur postime në rrjete sociale dhe faqe interneti që shfaqin imazhin e Musk duke u folur me punëtoren e Starbucks, dhe Google për të kërkuar me fjalë kyçe historinë e pretenduar.
Këto kërkime na çuan tek kanali Prime Hub në YouTube, i cili ka publikuar fillimisht pretendimin.
Më 2 dhjetor 2024, kanali postoi një video me titull, “Elon Musk ndal në vend kur dëgjon se arkëtarja e Starbucks nuk mund të përballojë dhuratë për vajzën & bën KËTË.”
Përshkrimi i videos lexonte:
Elon Musk i befason të gjithë në një Starbucks lokal kur mëson se një arkëtare punëtore po përpiqet të blejë një dhuratë për vajzën e saj. Ajo që do të ndodhë më pas do t’ju ngrohë zemrën dhe do të frymëzojë mirësi. Shikoni këtë moment të jashtëzakonshëm teksa miliarderi i teknologjisë ndërhyn për të bërë një ndryshim.
Kjo histori prekëse na kujton se dhembshuria nuk njeh kufij. Mos e humbisni!
Një njoftim në faqen kryesore të kanalit thoshte: “Historitë e shpërndara në këtë kanal janë thjesht fiktive dhe të krijuara ekskluzivisht për qëllime argëtimi. Çdo ngjashmëri me ngjarje, individë ose rrethana reale është krejtësisht e rastësishme dhe e paqëllimshme. Këto tregime nuk kanë për qëllim të portretizojnë, referojnë ose përfaqësojnë ndonjë ngjarje, njerëz ose organizatë të vërtetë.”
Video në fjalë përmban rrëfim zanor dhe redaktim të krijuar me mjete të inteligjencës artificiale (AI), ndërthurur me foto dhe video të vërteta. Asnjë nga fotot ose videot e vërteta nuk tregojnë Musk në një kafene Starbucks.
Një mjet AI krijoi imazhin e rremë të Musk duke folur me arkëtaren, siç dëshmohet nga dizajni i deformuar i logos së Starbucks, në përparësen e baristës dhe pamja e çuditshme e gishtërinjve në dorën e saj të djathtë. Problemet me gishtat mbeten një nga shenjat që dikush ka krijuar një imazh me AI.
Sipas videos, ngjarja e pretenduar ndodhi në një kafene Starbucks në Congress Avenue në Austin. Megjithatë, sipas mediave vendase, kafeneja e vetme Starbucks në Congress Avenue është mbyllur në gusht 2022.
