Pretendimi: Tymi që shpërndahet nga këto mjete është pjesë e spërkatjeve me kimikate nga qielli
Verdikti: Mungon konteksti
Përdorues të rrjeteve sociale në vendin tonë kanë shpërndarë disa pamje të mjeteve ushtarake që lëshojnë një tym të bardhë. Në këto postime pretendohet se këta “mjete diabolike” po lëshojnë kimikate duke spërkatur njerëzimin, e lidhur kjo edhe me teorinë e “gjurmëve të avionëve” apo aludime të tjera për teori konspirative.
“Po në shkollë dhe nëpër libra si ua ka mësuar apo shpjeguar sistemi diabolik këto pamje? Të na përgjigjen ata me 3 universitete e sipër”- shkruan një përdorues duke ndarë videon.
Postimet e shpërndara në rrjetet sociale
Ne vendosëm të bëjmë një verifikim të këtyre mjeteve, për të kuptuar se çfarë janë ato. Fillimisht kërkuam nëpërmjet “Google Image”, ku rezulton se kjo bëhet fjalë për një makineri tymi e quajtur TDA-3.
Sipas informacioneve, këto mjete ushtarake përdoren nga trupat ruse të mbrojtjes. TDA-3, i integruar në Ushtrinë e Federatës Ruse midis 2016 dhe 2017, është krijuar për të formuar një “perde tymi” për të siguruar mbrojtje nga kundërshtarët gjatë sulmeve të ndryshme, kryesisht gjatë atyre me dron. Falë reve të dendura të tymit që lëshon, pajisjet bëhen të padukshme për gjurmimet infra të kuqe, duke e bërë gati të pamundur shënjestrimin e saktë.
Sistemi zakonisht përdor një përzierje që kur ndizet, prodhon tym të dendur dhe të trashë, i aftë për të mbuluar një zonë të gjerë. Varianti TDA-3 lëviz në një kamion me makinë 6×6 (KamAZ-5350). Krahasuar me pararendësin e tij, TDA-2, ai kërkon vetëm një ekuipazh prej dy anëtarësh për të operuar.
Kjo taktikë raportohet se është përdorur së fundi nga trupat ruse në rajonin perëndimor të Luhanskut gjatë luftimeve në Ukrainë.
Pra, ndryshe nga çfarë pretendohet në rrjetet sociale, këto makineri po përdoren nga rusët në luftë dhe jo për të spërkatur kimikate për njerëzimin.
