Pretendimi: Kamala Harris me barkun e rrumbullakosur shfaqet krah Trump
Rate: Mungon konteksti
Fotot dhe videot romantike mes Donald Trump dhe Kamala Harris janë të gjeneruara nëpërmjet programeve të Inteligjencës Artificiale.
Në artikuj dhe postime të shpërndara në rrjetet sociale në vendin tonë shfaqen foto dhe video të kandidatëve për president të ShBA-ve, Donald Trump dhe Kamala Harris. Në këto pamje, ata shfaqen të afërt me njërin-tjetrin dhe në një prej videove Kamala Harris shihet me barkun e rrumbullakosur.
“Video e Trump me Kamala Harris me barkun e rrumbullakosur që po çmend rrjetet”- shkruhet në tekstin që shoqëron foton.
Postimet e shpërndara në rrjetet sociale
Ndryshe nga titulli që ka si qëllim tërheqjen e klikimeve, në brendësi të shkrimit thuhet se kemi të bëjmë me pamje të gjeneruara me anë të programit të Inteligjencës Artificiale.
“Inteligjenca artificiale bëri sërish mrekullinë e saj dhe këtë herë mbushi internetin me foto false të dyshes së rivalëve për presidencën amerikane, Kamala Harris dhe Donald Trump”, shkruajnë portalet shqiptare.
Nëpërmjet programeve të verifikimit të imazheve të rreme, konstatuam se fotot janë të modifikuara ose të gjeneruara nëpërmjet programeve kompjuterike.
Gjithashtu, nëpërmjet kërkimit me “Google Reverse Image” gjetëm edhe imazhet e shpërndara në rrjetin X të Harris dhe Trump.
Në përshkrimin e pamjeve përcaktohet qartë se janë foto dhe video të krijuara me AI. Pra, asgjë nuk është reale në imazhet e shpërndara në portale apo në media sociale, të cilat janë përdorur si karrem (clickbait) për lexuesit për të tërhequr klikime.
Faktoje ka verifikuar një sërë imazhesh dhe videosh të gjeneruara me AI që kanë qarkulluar në rrjetet sociale.
