Laçi është pa një spital që prej 26 nëntorit 2019, kur ndërtesa doli jashtë funksionit për shkak të tërmetit. Qeveria premtoi se spitali që mbulon nevojat e 80 mijë banorëve do ishte gati në qershor 2020, por puna për ndërtimin e tij filloi më 5 shkurt të këtij viti. Ndërkohë që premtimet për spitalin e Laçit u zvarritën në mënyrë të përsëritur, paradoksalisht qeveria shqiptare, e mbështetur nga Turqia, njoftoi ndërtimin e një spitali të dytë rajonal në Fier brenda 3 muajve. Nga një verifikim i Faktoje, rezulton se spitali i Fierit është drejt përfundimit, duke vendosur një standard të dyfishtë në krahasim me vonesat që shoqëruan rindërtimin në Laç.
Spitali i Laçit
Hyrja për në spitalin e Laçit, 4 shkurt 2021
Në Laç, goditja nga tërmeti i 26 nëntorit 2019 nxorri jashtë funksionit spitalin e qytetit. Kryetarja e Bashkisë Kurbin, zonja Majlinda Cara i ka përsëritur disa herë kryeministrit domosdoshmërinë e spitalit të ri, ndërkohë që popullësia përballet edhe me pandeminë.
“Në fakt për komunitetin ishte i domosdoshëm, për arsyen se edhe urgjencën e kemi në ambiente të marra me qera dhe duhet t’i shërbente shumë shpejt po të fillonim punën me spitalin.” – i tha zonja Cara kryeministrit në një takim në Laç më 28 korrik të viti të kaluar.
Kryeministri Rama, siç kemi shkruar edhe më parë, u justifikua se vonesat e rindërtimit kishin shkak pandeminë.
“Na hëngri shumë kohë kjo mbyllja plus edhe gjithë angazhimi i Ministrisë së Shëndetësisë në çështjen e Covid-it dhe nuk arritëm dot që të fillojmë më shpejt…”- u shpreh ai.
Më 2 shkurt Faktoje bëri verifikimin e radhës në Laç dhe i vetmi ndryshim që gjetëm ishte pastrimi i inerteve të godinës së shumbur. Puna për të ndërtuar spitalin e Laçit nuk kishte filluar ende, rreth 7 muaj pas skadimit të afatit për përfundimin e kësaj vepre.
Zona e spitalit të Laçit, 4 shkurt 2021
Zona e spitalit të Laçit, 4 shkurt 2021
Më 9 shkurt, gjatë një inspektimi në Laç të lagjeve që po rindërtohen nga qeveria turke, kryeministri u informua nga kryebashkiakja se punimet për spitalin kishin nisur.
“Ndërkohë spitali ka filluar, firma, punimet po avancojnë edhe aty. D.m.th. i gjithë sheshi i ndërtimit. Janë në përgatitje që firma po akomodohet të sjellë mjetet dhe infrastrukturën e nevojshme dhe më në fund filloi edhe spitali si një projekt që edhe banorët e kanë pritur me endje”- tha zonja Cara.
Më 16 shkurt, kryeministri Rama shkoi sërish në Laç, në kantierin e spitalit të ri, i shoqëruar nga ministrja e Shëndetësisë, zonja Ogerta Manastirliu, si dhe kryetarja e Bashkisë Kurbin.
Kantieri i spitalit të Laçit, 16 shkurt
“Kryeministër, kemi filluar tashmë prej 5 shkurtit punimet e spitalit bashkiak të Laçit.” – tha ministrja Manastirliu.
Afati i ri për përfundimin e spitalit ishte për 4 muaj, por kryeministri Rama kërkoi që kjo punë të përfundonte më parë.
“Duhet të punoni 24 orë, me tre turne, që ta mbarojmë para afatit. Edhe është e mundur, se është një volum relativisht i vogël edhe me këtë teknologji besoj që kryhet me sukses.” – tha ai. Nëse ky premtim do të mbahet, llogaritet që spitali i Laçit të jetë gati në muajin qershor.
Më 12 mars 2021, situata në kantierin e spitalit të Laçit kishte ndryshuar pak, pothuajse aspak po ta krahasosh me ritmin e punimeve në spitalin të Fierit.
Kantieri i spitalit të Laçit më 11 mars, foto e dërguar nga lexuesit e Faktoje
Spitali i Fierit, përfundon para atij të Laçit
Më 9 janar, kur spitali i Laçit ishte ende një grumbull inertesh të papastruara, kryeministri Rama lajmëroi ndërtimin e një spitali të dytë Rajonal të Fierit, me mbështetjen e qeverisë turke. Afati i përfundimit, si për ironi, ishte brenda 3 muajve!
“Çështja është që sfida, siç e dëgjuat, ky spital do ndërtohet për 3 muaj.” – tha kryeministri Rama.
Kantieri i spitalit të Fierit u hap rreth 3 javë përpara kantierit të spitalit të Laçit, që po sipas premtimit fillestar të zotit Rama duhej të ishte në funksion që në qershor 2020.
Kantieri i spitalit të Fierit, 22 janar 2020
Nga kjo datë e në vijim, kryeministri ka bërë publike disa herë ecurinë e spitalit të Fierit në rrjetet e tij sociale, e cila duke gjykuar nga pamjet po ecën me shpejtësi të konsiderueshme.
Kantieri i spitalit të Fierit, dita 30 e punës, 12 shkurt 2021
Ndërsa pamjet e fundit të spitalit të Fierit, që tregojnë se puna është në rrugë të mirë drejt përfundimit, është bërë publike më 11 mars nga kryeministri Rama, rreth 2 muaj nga fillimi i punës.
Spitali i Fierit, 11 mars 2021
Qeveria ka shpjeguar se ndër të tjera, ndërtesa e spitalit të Fierit do të përbëhet nga një strukturë “super anti-sizmike“.
Nga një ballafaqim i ecurisë së dy spitaleve, atij të Laçit, jetik për 80 mijë banorët e zonës dhe atij të Fierit, që është i dyti për këtë rajon, dallojnë dy standardet e përdorura kur vjen fjala tek serioziteti dhe ritmet e realizimit të projekteve me interes publik.
