Një video që po qarkullon në mediat sociale duke treguar një dritë, që pretendohet se është shfaqur natën e tërmetit në Turqi, rezulton të jetë realizuar në shtator 2022 në Kazakistan pas nisjes së anijes hapësinore Soyuz..
————————————————————
Tërmeti që goditi Turqinë dhe Sirinë në 6 shkurt 2023 është ndjekur nga një valë keqinformimi në internet dhe mediat sociale.
Ndër to, është një video që pretendon se tregon një dritë ‘të çuditshme’ në qiellin e Turqisë përpara se të godiste tërmeti 7.5 ballë.
“Përpara tërmetit në Turqi”
Verifikimi i “Faktoje” me anë të makinave të kërkimit të fotove zbuloi se kjo video është shfaqur më parë në TikTok, në Janar 2023, dhe Tëitter, në Tetor 2022. Versioni më i herët i videos është hedhur në Telegram në 25 shtator 2022.
Video është shfaqur në Telegram për herë të parë në 25 shtator 2022
Në Telegram, video është shoqëruar me përshkrimin: “Balkash. E shtunë.”
Balkash është një qytet në Kazakistan. Në fakt, anija hapësinore Soyuz MS-22 u nis nga Kozmodroma e Baikonurit në Kazakistan për Stacionin Hapësinor Ndërkombëtar më datë 21 shtator 2022.
Raportime nga media kazake flasin për ‘drita të çuditshme’ që u vunë re nga qytetarët e vendit në ditën e nisjes së raketës. Këto drita kanë të njëjtën formë ‘kandili deti’ si ato në videon e shpërndarë si të ishte në Turqi.
Me gjasa drita në video është në fakt Soyz MS-22.
Megjithatë, çka është e sigurt është se video në fjalë nuk ka të bëjë aspak me tërmetin në Turqi.
