Pretendimi se në treg po përdoret mish artificial i njeriut, i prodhuar në një fabrikë në Angli po ngjall jo pak shqetësim në rrjetet sociale. Verifikimi i Faktoje tregon se pamjet e publikuara nga kanali televiziv anglez, Channel 4 janë të një dokumentari satirik.
Jona Plumbi
Një video e marrë nga dokumentari satirik për kanibalizmin, i quajtur “Gregg Wallace: Mishi Britanik i Mrekullive”, po qarkullon në rrjet me pretendimin se bëhet fjalë për një rast të vërtetë. Llogari në rrjete sociale, si ky këtu, e kanë shpërndarë videon ku duken skena të një laboratori për rritjen e mishit artificial të njeriut, duke sugjeruar se ngjarjet janë të vërteta.
“PROBLEMI I ZISË SË BUKËS ZGJIDHET – MISHI ARTIFICIAL I NJERIUT? Fabrika e përpunimit Good Harvest ka qenë në punë për më shumë se tetë muaj dhe prodhon 50.000 biftek në ditë nga mishi i njeriut. A po përgatitemi që mishi i njeriut të bëhet normal? Predimi i insekteve, mishi artificial i njeriut, çfarë ka më pas? Qëndroni vigjilentë, qëndroni kritikë. Burimi MOS HARRO – MENDO PËR VETEN TËNDE FaktenFriedenFreiheit” – shkruan në 6 shtator një përdorues shqiptare i Facebook për videon në fjalë.
Në video duken punonjës të lumtur të një fabrike që përpunon mish artificial njeriu për ta shpërndarë në treg në formën e biftekut. Ai duket si një dokumentar i mirëfilltë i një fabrike që prodhon, përpunon dhe shpërndan mish artificial njeriu për konsum ushqimor.
Nisur nga këto të dhëna një kërkim në rrjet me fjalët kyçe zbulon se dokumentari është publikuar në vitin 2023 nga Channel 4 në Britaninë e Madhe dhe kategorizohet si satirë.
Artikuj të shumtë të mediave britanike gjenden lehtësisht në rrjet ku shkruajnë lidhur me reagimet që ky dokumentar satirik ka ngjallur në Britaninë e Madhe.
Duke përfituar nga personaliteti i tij tepër i gëzuar, prezantuesi ka nxjerrë një nga mashtrimet më të mira në historinë e medias me dokumentarin e tij fals “The British Miracle Meat” – shkruajti The Guardian në datën 26 Korrik 2023. Një tjetër artikull i së njëjtës media shkruan se “Zemërimi do të zgjasë për vite” – a është “The British Miracle Meat” satira më shqetësuese televizive ndonjëherë?”
The Guardian e cilëson dokumentarin një satirë e pastër për krizën e kostos së jetesës, edhe pse nuk është aspak delikate.
Nisur nga këto të dhëna publike mund të themi se pretendimi se mishi artificial i njeriut po përdoret për ushqim është plotësisht i pavërtetë.
*Lajmi publikohet në kuadër të bashkëpunimit mes Faktoje dhe Facebook për të luftuar dizinformimin
