Vaksinat nuk shkaktojnë autizëm te fëmijët, siç aludohet në disa postime të shpërndara në rrjetet sociale. Referuar të dhënave të organizmave botërorë, 1 në 100 fëmijë në botë janë të prekur nga çrregullimi i spektrit autik.
Në një postim të shpërndarë në Facebook, analisti i teorive konspiracioniste Alfred Cako pretendon se vaksinat ndikojnë në shfaqjen e autizmit te fëmijët. Madje ai pretendon se në 7-8 fëmijë, 2 janë autikë, për shkak të vaksinave.
“Bombardimi sapo lindin i bebushave me metale të rënda në 8 vaksina, pa mbushur 2 muaj nga dalja në jetë, në Itali. Zoti e bën fëmijën të persosur, globalistët i sulen me shiringa duke ja rrasur me detyrim që ta dëmtojnë. Rezultati? Në 7-8 fëmijë 2 jane autikë. Mallkimi i kohës sonë!”-shkruan në Facebook Alfred Cako.
Postimi i shpërndarë nga Alfred Cako
Pretendimi i Cakos ngre alarmin për prindërit dhe vë në dyshim efikasitetin e vaksinave. Mirëpo, të dhënat e institucioneve ndërkombëtare kanë treguar qartë në të gjitha studimet e kryera se vaksinat nuk shkaktojnë autizëm.
Disa njerëz kanë pasur shqetësime se ASD (Çrregullimi i spektrit autik) mund të lidhet me vaksinat që marrin fëmijët, por studimet kanë treguar se nuk ka asnjë lidhje midis marrjes së vaksinave dhe zhvillimit të ASD. Akademia Kombëtare e Mjekësisë, e njohur më parë si Instituti i Mjekësisë, shqyrtoi sigurinë e 8 vaksinave për fëmijët dhe të rriturit”, sqaron Qendra për Kontrollin dhe Parandalimin e Sëmundjeve, CDC.
Veç kësaj, shifrat që paraqet Cako në postimin e tij, nuk përputhen me të dhënat zyrtare të raportuara nga studimet e kryera. Të dhënat e fundit, publikuar më 23 korrik 2023, referuar CDC dhe OBSH-së tregojnë se në botë, 1 në 100 fëmijë janë diagnostikuar me spektrin autik. Në SHBA shifrat janë më shqetësuese, ku 1 në 36 fëmijë vuan nga autizmi.
Sipas Autism Speaks hulumtimet tregojnë se gjenetika është e përfshirë në shumicën dërrmuese të rasteve. “Fëmijët e lindur nga prindër të mëdhenj në moshë janë në rrezik më të lartë për të pasur autizëm. Prindërit që kanë një fëmijë me ASD kanë një shans 2% deri në 18% për të pasur një fëmijë të dytë, i cili gjithashtu është i prekur.
Studimet kanë treguar se midis binjakëve identikë, nëse një fëmijë ka autizëm, tjetri do të preket rreth 36% deri në 95% të rasteve. Tek binjakët jo identikë, nëse njëri fëmijë ka autizëm, atëherë tjetri preket rreth 31% të rasteve.
Gjatë dy dekadave të fundit, kërkime të gjera kanë pyetur nëse ka ndonjë lidhje midis vaksinimeve të fëmijërisë dhe autizmit. Rezultatet e këtij hulumtimi janë të qarta: Vaksinat nuk shkaktojnë autizëm”.
Faktoje ka verifikuar edhe më herët lajme të rreme nga Alfred Cako në lidhje me vaksinimin.
