Autorizimi që presidenti i Ekuadorit i bëri përdorimit të armëve nga civilët është pasojë e pasigurisë në rritje nga bandat e drogës dhe nuk ka asnjë lidhje me “skllavërimin nga elitat”.
Jona Plumbi
Lajmi që vjen nga Ekuadori, vend ku presidenti Guilermo Lasso ka ligjëruar mbajtjen e armëve të zjarrit nga civilët, është keqinterpretuar dhe shpërndarë në rrjet.
“Presidenti Guillermo Lasso u ka kërkuar miliona ekuadorianëve që të armatosen sa më shpejt që të jetë e mundur në mënyrë që të mbrohen kundër elitave tiranike që duan t’i skllavërojnë.” Ky është pretendimi i ngritur në rrjet mbi vendimin e politikanit ekuadorian që i përket qendrës së djathtë.
Në fakt Ekuadori ka autorizuar mbajtjen dhe përdorimin e armëve nga civilët. Në një deklaratë që Presidenti Guillermo Lasso bëri në një transmetim live në 2 Prill, ai shpalli gjithashtu gjendjen e jashtëzakonshme në disa rajone, një prej tyre dhe qyteti i tij i lindjes, Guayaquil, i njohur për shqiptarët si porti ku nisen kontenierët e bananeve me drogë.
Arsye për këtë vendim Lasso përmendi rritjen e krimit dhe pasigurisë në vend. Ky ishte edhe mesazhi që presidenti i Ekuadorit shpërndau sëbashku me videon ku njoftonte tre masa të reja të marra për të luftuar krimin në vend.
“Frika më e madhe sot është ndjenja e pasigurisë. Për këtë arsye, ne shpallim tre masa të menjëhershme në këtë #KryqëzatëPërSigurinë Tuaj për të luftuar armikun më të madh që kemi, që është krimi, trafiku i drogës dhe krimi i organizuar.” – shkruajti Lasso në Twitter.
“Ne kemi modifikuar dekretin që lejon posedimin dhe mbajtjen e armëve. Me fjalë të tjera, në terma të përgjithshëm mbajtja e armëve për përdorim civil në mbrojtje personale është e autorizuar, në përputhje me kërkesat e ligjit dhe rregulloreve ”, tha ai.
Presidenti shpalli gjendje të jashtëzakonshme në disa qytete të vendit, pa e njoftuar se sa do të zgjasë ajo.
Ashtu si duket edhe nga deklaratat e Presidentit të Ekuadorit, arsyeja për lejimin e përdorimit të armëve nga civilët, nuk ka asnjë lidhje me elitat apo skllavërimin e qytetarëve, si pretendohet nga publikimi në rrjetin social Facebook. Vetë presidenti Lasso ishte një biznesmen dhe bankier i suksesshëm përpara se të vendoste që të kandidonte në politikë. Forca e tij politike i përket qendrës së djathtë, ndryshe nga e kaluara e gjatë politike e Ekuadorit.
Pas fitores së tij në në vitin 2021, vendi pranoi ndihmën e FMN dhe administrata e tij u fokusua në orientimin drejt Shtetet të Bashkuara, Kilit dhe Brazilit, duke u distancuar nga Kuba dhe Venezuela.
Nisur ky verifikim, informacioni i publikuar në Facebook kategorizohet si i pavërtetë.
*Lajmi publikohet në kuadër të bashkëpunimit mes Faktoje dhe Facebook për të luftuar dizinformimin
