Pretendimi: Qeveria shqiptare ndryshoi orarin e punës së administratës si pasojë e temperaturave të larta
Verdikti: Mungon konteksti
———————————————————-
Një numër mediash dhe portalesh shqipfolëse kanë raportuar më 16 korrik se “i nxehti afrikan” ka çuar në një vendim të qeverisë shqiptare për të reduktuar oraret e punës në administratë.
Artikujt e mësipërm e kanë krahasuar vendimin e qeverisë shqiptare me atë të Ministrisë së Shëndetësisë së Kosovës, e cila ka marrë vendim për kufizimin e orëve të punës për disa kategori të caktuara, si gratë shtatzëna, dhe sektorin e ndërtimit deri më 20 korrik.
Në mes të kësaj vale të nxehti, një numër qeverish kanë marrë masa të ngjashme. Franca ka reduktuar orarin e punës për sektorin e ndërtimit. Greqia ka urdhëruar disa biznese të mos lejojnë punëtorët të kryejnë punë të rënda jashtë prej orës 12:00 deri në orën 17:00. Vitin e kaluar, Spanja vendosi të ndalonte punën në ambjente jashtë në temperatura ekstreme.
Studimet tregojnë se produktiviteti në punë bie me 40% në temperatura mbi 32 gradë celsius, ndërsa kur temperaturat arrijnë 40 gradë celsius, produktiviteti ulet me 76% përgjatë gjithë ditës së punës.
Megjithatë, propozimi i ministres së shtetit në Shqipëri, i cili përfshin vetëm punonjësit e administratës, nuk është ndonjë masë që ajo ka marrë për përkujdesjen ndaj shëndetit të popullsisë dhe punëtorëve gjatë krizës klimaterike.
Me anë të një njoftimi për shtyp, vetë Ministri i Shtetit për Administratën Publike dhe Antikorrupsionin ka specifikuar se ndryshimet e propozuara në orarin e administratës nuk lidhen “me temperaturat e larta të ditëve të fundit, sikurse është publikuar në disa portale, por me injektimin në mënyrë të qëndrueshme të fleksibilitetit në punë.”
Njoftimi i Ministrisë për mediat
